पुणे: हवामानातील बदल आणि वाढत्या प्रदूषणामुळे (Dust Allergy) सध्या अनेकांना धुळीच्या ॲलर्जीचा (Dust Allergy) त्रास जाणवत आहे. घराबाहेर पडल्यावर किंवा घराची साफसफाई करताना सतत शिंका येणे, नाक वाहणे किंवा डोळ्यांतून पाणी येणे ही या ॲलर्जीची मुख्य लक्षणे आहेत. वैद्यकीय भाषेत याला ‘रायनाइटिस’ असेही म्हटले जाते. जर तुम्हालाही धुळीचा त्रास होत असेल, तर वेळीच सावध होणे आणि काही घरगुती उपाय करणे फायदेशीर ठरू शकते.
धुळीची ॲलर्जी टाळण्यासाठी सर्वात महत्त्वाचा उपाय म्हणजे स्वतःचा बचाव करणे. घराबाहेर पडताना नेहमी नाकाला रुमाल किंवा मास्क वापरावा. यामुळे हवेतील धुलीकण श्वसनमार्गाद्वारे शरीरात जात नाहीत. तसेच, घरातील पडदे, सोफा आणि गाद्यांची वेळोवेळी साफसफाई करणे आवश्यक आहे. साफसफाई करताना नाकाला मास्क लावल्यास धुळीचा थेट संपर्क टाळता येतो. घरामध्ये हवा खेळती राहील याची काळजी घ्यावी आणि शक्य असल्यास ‘एअर प्युरिफायर’चा वापर करावा.
घरगुती उपायांमध्ये कोमट पाण्याचे सेवन करणे अत्यंत गुणकारी ठरते. जर नाक सारखे चोंदत असेल, तर गरम पाण्याची वाफ घेतल्याने आराम मिळतो. तुळस, आले आणि गवती चहाचा काढा घेतल्याने शरीराची रोगप्रतिकारशक्ती वाढते आणि ॲलर्जीचा प्रभाव कमी होतो. याशिवाय, रात्री झोपताना हळदीचे दूध घेतल्यानेही घशातील खवखव आणि सर्दी कमी होण्यास मदत होते.
जर या उपायांनीही आराम मिळत नसेल आणि श्वास घेण्यास त्रास होत असेल, तर घरगुती उपचार करत न बसता तज्ज्ञ डॉक्टरांचा सल्ला घेणे गरजेचे आहे. अनेकदा दुर्लक्ष केल्यामुळे या त्रासाचे रूपांतर सायनस किंवा अस्थमामध्ये होऊ शकते. त्यामुळे आहारावर नियंत्रण ठेवून आणि धुळीपासून लांब राहून आपण या त्रासावर मात करू शकतो.
