Dry Eye Syndrome : मुंबई : वाढते प्रदूषण, सतत मोबाईल पहाणे आणि थंड हवामान यांमुळे आपले डोळे कोरडे होतात. या सर्व गोष्टी तुमच्या डोळ्यांसाठी हानिकारक ठरू शकतात. या समस्येला ‘ड्राय आय सिंड्रोम’ म्हणतात. हे थांबविण्यासाठी काय उपाय आहेत? ड्राय आय सिंड्रोम म्हणजे काय? त्याची लक्षणे आणि प्रतिबंध करण्याच्या पद्धती नेमक्या कोणत्या हे जाणून घेऊयात.
ड्राय आय सिंड्रोम म्हणजे काय?
टीयर फिल्म हा डोळ्यातला थर डोळ्यांचे संरक्षण करण्यासाठी आवश्यक आहे. या थरात अश्रूग्रंथी असतात. अश्रूंच्या थरातील समस्यांमुळे डोळ्यांत दिसण्यात अडचण येऊ शकते. डोळ्यांत अश्रू नसल्यामुळे किंवा ते लवकर कोरडे झाल्यामुळे ही समस्या उद्भवते. त्यामुळे डोळ्यांची जळजळ, खाज सुटणे किंवा अंधुक दृष्टी येण्यासारख्या अनेक समस्या उद्भवू शकतात.
लक्षणे काय आहेत?
डोळ्यांची जळजळ होणे, दृष्टी धूसर होणे,प्रकाशाचा त्रास होणे, डोळ्यांची उघडझाप करण्यात अडचण ,डोळ्यांना खाज सुटणे, डोळे लाल होणे, जास्त अश्रू येणे.
उपाय काय?
डॉक्टरांचा सल्ला घ्या : डोळ्यांच्या कोरडेपणाची समस्या बरी होत नसल्यास, डॉक्टरांशी थेट संपर्क साधा.
धूम्रपानापासून दूर राहा : धूम्रपानामुळे तुमच्या डोळ्यांवर वाईट परिणाम होऊ शकतो. त्यामुळे धुम्रपान करू नका
प्रदूषण टाळा : हवेत असलेल्या हानिकारक प्रदूषकांमुळे डोळे कोरडे होऊ शकतात. त्यामुळे प्रदूषणापासून डोळ्यांचे रक्षण करणे अत्यंत गरजेचे आहे. त्यामुळे बाहेर जाताना चष्मा वापरा जेणेकरून तुमच्या डोळ्यातील प्रदूषण कमी होईल.
कामात ब्रेक घ्या : फोन किंवा लॅपटॉप स्क्रीनकडे बराच वेळ पाहिल्यामुळे डोळ्यांवर परिणाम होऊ शकतो. म्हणून, जर तुम्हाला बराच वेळ स्क्रीनकडे पाहावे लागत असेल तर, डोळ्यांना विश्रांती देण्यासाठी वेळोवेळी ब्रेक घ्या.
ह्युमिडिफायर : हिवाळ्यात हवा कोरडी होते, त्यामुळे डोळेही कोरडे होऊ लागतात. हे टाळण्यासाठी, तुमच्या खोल्यांमध्ये ह्युमिडिफायर वापरा. यामुळे तुमच्या डोळ्यातील ओलावा टिकून राहील.
