पुणे: वीकेंड (Beer Side Effects) असो किंवा एखादी पार्टी, अनेकजण बीअर किंवा इतर अल्कोहोलचे सेवन करतात. शरीरात टॉक्सिन्स जमा होतात आणि डिहायड्रेशन होते. अनेक लोकांना बीअर किंवा अल्कोहोल प्यायल्यानंतर होणाऱ्या हँगओव्हरचा त्रास माहित असतो. मात्र, अल्कोहोल शरीरातून बाहेर पडल्यानंतरही त्याचे गंभीर आणि दीर्घकाळ टिकणारे परिणाम शरीरावर होत राहतात. बीअरमध्ये कॅलरी जास्त असतात आणि ती यकृतावर थेट ताण आणते. बीअरमुळे शरीराच्या विविध अवयवांवर नेमका काय भयंकर परिणाम होतो, हे जाणून घेणे महत्त्वाचे आहे.
यकृताचे नुकसान
बीअरचे जास्त सेवन केल्याने होणारा सर्वात मोठा परिणाम यकृतावर होतो. यकृत शरीरातील विषारी घटक बाहेर टाकण्याचे काम करते. अल्कोहोलचे प्रमाण जास्त झाल्यास, यकृत हे विषारी पदार्थ फिल्टर करताना थकून जाते. ज्यामुळे यकृताच्या पेशींमध्ये चरबी जमा होते आणि त्याची कार्यक्षमता कमी होते.
जर ही स्थिती दीर्घकाळ कायम राहिली, तर यकृताचे कार्य थांबते आणि सिरोसिससारखा गंभीर आजार होण्याची शक्यता वाढते.
हृदयावर आणि रक्तदाबावर थेट परिणाम
बीअरमुळे फक्त यकृतच नाही, तर आपल्या हृदयावरही ताण येतो. जास्त प्रमाणात बीअर पिल्याने हृदयाचे ठोके असामान्य होतात आणि रक्तदाब वाढतो.
दीर्घकाळ अल्कोहोलचे सेवन केल्याने हृदयाचे स्नायू कमकुवत होतात, ज्याला ‘अल्कोहोलिक कार्डिओमायोपॅथी’ म्हणतात. यामुळे हृदय शरीराला पुरेसे रक्त पुरवू शकत नाही. क्तदाब वाढल्यामुळे भविष्यात हृदयविकाराचा झटका येण्याचा धोकाही वाढतो.
बीअरचे परिणाम केवळ अंतर्गत अवयवांपर्यंत मर्यादित नसतात, तर ते पचनसंस्था आणि मानसिक आरोग्यावरही गंभीर परिणाम करतात.
-
पचनसंस्था: अल्कोहोलमुळे पोटाच्या आतील भागांना सूज येते. यामुळे शरीरात पोषक तत्वांचे शोषण व्यवस्थित होत नाही आणि पोटदुखी, गॅससारख्या समस्या वाढतात.
-
वजन वाढणे: बीअरमध्ये कॅलरीज मोठ्या प्रमाणात असल्याने वजन वेगाने वाढते.
-
मानसिक आरोग्य: अल्कोहोलमुळे झोपेत अडथळे येतात. झोपेचा नैसर्गिक सायकल बिघडल्यामुळे तणाव आणि नैराश्य वाढू शकते.
या सर्व गंभीर परिणामांमुळे, तज्ज्ञ नेहमी अल्कोहोलचे सेवन पूर्णपणे टाळण्याचा सल्ला देतात.
(Disclaimer- बीअर किंवा अल्कोहोलचे सेवन पूर्णपणे टाळणे हे आरोग्यासाठी सर्वात उत्तम आहे. या बातमीचा उद्देश कोणताही वैद्यकीय सल्ला देणे नाही.)
