मुंबई : मराठमोळी अभिनेत्री प्रिया मराठे हिचं अवघ्या 38 व्या वर्षी कर्करोगाने निधन झालं. तिच्या जाण्यानं मनोरंजन विश्वाला मोठा धक्का बसला असून, या घटनेतून पुन्हा एकदा कर्करोगाच्या गंभीरतेची जाणीव अधोरेखित झाली आहे.
कर्करोग हा आजार कोणत्याही वयात होऊ शकतो. बदलती जीवनशैली, असंतुलित आहारपद्धती आणि ताणतणावामुळे आता कमी वयातही या आजाराची प्रकरणं झपाट्याने वाढत आहेत.
तरुणांमध्ये कर्करोगाची वाढती प्रकरणं
अलीकडील संशोधनानुसार, 50 वर्षांखालील व्यक्तींमध्ये कर्करोगाची रुग्णसंख्या वाढते आहे. विशेषतः स्तनाचा कर्करोग, आतड्याचा (कोलन) कर्करोग आणि लिम्फोमा या प्रकारांचे रुग्ण प्रमाणात वाढले आहेत.
पूर्वी हा आजार वृद्धांचा मानला जात असला तरी, आता तरुण व मध्यमवयीन लोकही याच्या विळख्यात सापडत आहेत. असंतुलित आहार, स्थूलता, प्रदूषण आणि शारीरिक हालचालींचा अभाव ही प्रमुख कारणं मानली जात आहेत.
सुरुवातीची सूक्ष्म लक्षणं वेळीच ओळखणं महत्त्वाचं
तज्ज्ञांच्या मते, सुरुवातीच्या टप्प्यातील लक्षणं अगदी साध्या तक्रारींसारखी वाटतात, पण त्याकडे दुर्लक्ष घातक ठरू शकतं.
1) अचानक वजन घटणे; भूक न लागणे किंवा खाल्लं तरी वजन झपाट्याने कमी होणे.
2) सतत थकवा, अशक्तपणा, झोपेच्या पद्धतीत बदल.
3) शरीरात गाठ जाणवणे, सतत सूज टिकून राहणे.
4) पचनाशी संबंधित समस्या, मलाच्या रंगात बदल, रक्त दिसणे.
5) कारणाशिवाय निळसर पडणे, वारंवार संसर्ग होणे.
6) हाडांमध्ये सतत दुखणे किंवा अनपेक्षित वेदना (सारकोमा).
7) डोकेदुखी वारंवार होणे, दृष्टीत बदल, पाठीत त्रास (मेंदू किंवा स्पाइन कर्करोग).
तज्ज्ञांच्या मते, साध्या वाटणाऱ्या तक्रारींनाही हलकं समजू नये. वेळीच निदान झाल्यास उपचार प्रभावी ठरतात, अन्यथा धोका वाढतो. त्यामुळे, शरीरात सतत बदल जाणवल्यास त्वरित तपासणी करणं आवश्यक आहे. वेळेवर उपचार केल्यास कर्करोगाशी लढणं शक्य आहे.
