Bharat Atta Sale: नवी दिल्ली: गव्हाच्या किमतीत वाढ झाल्यानंतर पिठाच्या किमतीत झालेली वाढ पाहता सरकारने सर्वसामान्यांना स्वस्त दरात पीठ देण्याचा निर्णय घेतला आहे. केंद्र सरकारने आजपासून ‘भारत आटा’ स्वस्त दरात विकण्याचा निर्णय घेतला आहे. सरकार ग्राहकांना 27.50 रुपये प्रति किलो दराने ‘भारत आटा’ विकणार आहे.
सरकार स्वस्तात पीठ विकणार
भारत ब्रँड नावाखाली पीठ विकण्यासाठी केंद्रीय अन्न आणि ग्राहक व्यवहार मंत्री पियुष गोयल यांनी दिल्लीतील कर्तव्य पथवर 100 मोबाईल व्हॅनला हिरवा झेंडा दाखवला. एक किलो ‘भारत आटा’ हा 27.50 रुपयांना विकला जाईल. या मोबाईल व्हॅन व्यतिरिक्त ‘भारत आटा’ केंद्रीय भंडारमध्ये देखील उपलब्ध असेल. याशिवाय नाफेड आणि एनसीसीएफ या सरकारी संस्थाही ग्राहकांना हे स्वस्त पीठ उपलब्ध करून देतील. ग्राहकांना स्वस्त दरात पीठ उपलब्ध करून देण्यास ‘भारत आटा’ची मदत होईल, असा विश्वास आहे. तसेच याद्वारे पिठाच्या वाढत्या किमतींवर नियंत्रण ठेवता येईल.
27.50 रुपये किलो दराने पीठ उपलब्ध
गव्हाच्या किमतीत झालेली वाढ लक्षात घेता, सरकारने केंद्र भंडार, एसीसीएफ आणि नाफेड यासारख्या एजन्सींना 21.50 रुपये प्रति किलो दराने 2.5 लाख टन गहू खुल्या बाजार विक्री योजनेंतर्गत उपलब्ध करून दिला आहे, ज्याचे पीठात रूपांतर करून विक्री केली जाते. ‘भारत आटा’ ब्रँडच्या नावाखाली 27.50 रुपये प्रति किलो दराने ग्राहकांना स्वस्त पीठ उपलब्ध करून द्यावे.
किमतींवर नियंत्रण ठेवण्याचे प्रयत्न
केंद्रीय मंत्री पियुष गोयल यांनी यावेळी सांगितले की, सरकारच्या हस्तक्षेपामुळे जीवनावश्यक वस्तूंच्या किमतींवर नियंत्रण ठेवण्यास मदत झाली आहे. ते म्हणाले की, टोमॅटो आणि कांद्याच्या किमती नियंत्रित करण्यासाठी सरकारने यापूर्वी अनेक पावले उचलली होती. त्यांनी सांगितले की, सरकार आधीच ग्राहकांना ‘भारत डाळ’ 60 रुपये किलो दराने विकत आहे.
सरकार बफर स्टॉकमधून गहू विकत आहे
किरकोळ बाजारात गव्हाच्या किमती वाढल्यानंतर, सरकारने खुल्या बाजार विक्री योजनेंतर्गत मार्च 2024 पर्यंत 101.5 लाख टन गहू विकण्याचा निर्णय घेतला आहे. गेल्या वर्षी सरकारने 57 लाख टन गव्हाची विक्री केली होती. गरज भासल्यास सरकार मार्च 2024 पर्यंत 25 लाख टन अधिक गहू बाजारात विकू शकते.
