पुणे: पुण्याच्या हडपसरमधील रामटेकडी परिसरात शनिवारी रात्री एका टोळक्याने कोयते आणि लोखंडी हत्यारे उगारत दहशत माजवली. टोळक्याने “आम्ही इथले भाई आहोत,” अशी धमकी देत घरांवर दगडफेक केली, ज्यामुळे दोन महिलांना गंभीर दुखापत झाली. ही घटना ३१ मे रोजी रात्री साडेअकराच्या सुमारास घडली.
वानवडी पोलिसांनी या घटनेतील एक आरोपी महेश विकास शिंदे (वय २०, रा. रामटेकडी) याला अटक केली आहे. तसेच, या प्रकरणी संतोष छबुराव सुपेकर (वय ४५, रा. रामटेकडी) यांनी प्रेम उर्फ पिट्या थोरात, दुर्वेश उर्फ बल्ल्या गायकवाड, अरविंद उर्फ नक्या माने, नितीन पाटोळे, ओंकार देढे, चेतन बावरी (वय १८ ते २०, सर्वजण रामटेकडीतील रहिवासी) यांच्यासह इतर काही साथीदारांविरोधात तक्रार दाखल केली आहे.
घटना कशी घडली?
संतोष सुपेकर आणि त्यांचा पुतण्या गणेश सुपेकर (वय २२) हे घरासमोर बसले होते, तेवढ्यात टोळक्याने अचानक हल्ला चढवला. हातात कोयते आणि हत्यारे घेऊन त्यांनी घरांवर दगडफेक सुरू केली आणि नागरिकांना शिवीगाळ केली. टोळक्याने संतोष सुपेकरला धमकावत, “तू प्रण्याबरोबर का फिरतो?” असं विचारत त्याच्यावर हल्ला केला. दगड आणि हत्यारे वापरून त्यांना जखमी करण्यात आले. या हल्ल्यात, नीलावती सतीश देडगे (वय ५०) आणि अनिता विश्वजीत ठोसर (वय ३८) या दोन महिलांना दगडाच्या घावामुळे गंभीर दुखापत झाली आहे.
पोलिसांचा तपास सुरू
वानवडी पोलिसांनी या प्रकरणाची गंभीर दखल घेतली असून, तपास सुरू केला आहे. पोलिस उपनिरीक्षक आशिष जाधव यांच्या मार्गदर्शनाखाली तपास कार्यवाही केली जात आहे. फरार आरोपींचा शोध घेण्यासाठी पोलिसांनी विविध पथके रवाना केली आहेत. घटनास्थळावर सीसीटीव्ही फुटेज उपलब्ध असल्यामुळे त्यावरून पुढील तपास करण्यात येत आहे. याप्रकरणी अधिक तपास सुरू असून, आरोपींविरोधात कायदेशीर कारवाई करण्यात येईल.
