ठाणे : ठाण्यातून समोर आलेल्या एका धक्कादायक घटनेनं पालकांमध्ये चिंता आणि संताप पसरवला आहे. शहरातील एका नामांकित शाळेत ४ वर्षांच्या चिमुकलीसोबत लैंगिक गैरवर्तन केल्याचा प्रकार उघडकीस आला आहे. पीडित मुलीने आईला घडलेला प्रकार सांगताच, तिने तातडीने पोलीस ठाणे गाठून तक्रार दाखल केली.
प्राथमिक माहितीनुसार, चिमुकली ठाण्यातील एका खाजगी शाळेत शिक्षण घेत आहे. ३० जुलै रोजी सकाळी ११:१५ ते दुपारी ३:०० या वेळेत हा प्रकार घडल्याची माहिती मुलीच्या पालकांनी दिली आहे. पीडितेने सांगितले की, निळ्या टी-शर्ट घातलेल्या एका व्यक्तीने तिच्यासोबत जबरदस्ती केली. हे ऐकताच आईने नवघर (मुलुंड) पोलीस ठाण्यात धाव घेत गुन्हा नोंदवला. परंतु, संबंधित शाळा ठाणे हद्दीत येत असल्यामुळे हा गुन्हा वर्तकनगर पोलीस ठाण्यात वर्ग करण्यात आला.
पोलिसांनी गंभीर दखल घेत तातडीने शाळेतील सीसीटीव्ही फुटेज तपासण्यास सुरुवात केली. प्राथमिक तपासात मुलगी आणि तिची मैत्रीण बाथरूमकडे जाताना सीसीटीव्हीत दिसून आल्या आहेत. मात्र त्यांच्यासोबत बाथरूममध्ये कोणी जाताना स्पष्टपणे दिसत नसल्याचे पोलिसांचे म्हणणे आहे. तरीही, मुलीच्या तक्रारीनुसार संशयिताने निळ्या रंगाचा टी-शर्ट घातला होता, अशी माहिती समोर आली आहे.
सध्या पोलिसांकडून अधिक तपास सुरू असून, शाळेतील कर्मचाऱ्यांची चौकशी, सीसीटीव्हीचा सखोल अभ्यास आणि घटनास्थळाचा पंचनामा केला जात आहे. पालकांनी केलेल्या तक्रारीनुसार, आरोपीचा शोध घेण्यासाठी पोलिसांनी विविध दिशांनी तपास सुरू केला आहे.
या घटनेमुळे पालकांमध्ये भीतीचं वातावरण निर्माण झालं आहे. शाळेतील सुरक्षेबाबत गंभीर प्रश्न निर्माण झाले असून, प्रशासनाकडून योग्य ती कारवाई होईल, अशी अपेक्षा व्यक्त होत आहे.
