पुणे: मुंबई–पुणे द्रुतगती मार्गावर वाहनचालकांकडून हफ्तेखोरी करणाऱ्या ट्रॅफिक वॉर्डनला संतप्त नागरिकांनी रंगेहात पकडून बेदम मारहाण केल्याची धक्कादायक घटना उर्से टोल नाक्यावर घडली. या घटनेचा व्हिडिओ सोशल मीडियावर मोठ्या प्रमाणावर व्हायरल झाला असून, वॉर्डनच्या कबुलीजबाबाचाही व्हिडिओ लोकांमध्ये चर्चेचा विषय ठरला आहे.
मिळालेल्या माहितीनुसार, संबंधित वॉर्डनने वाहनचालकाकडून वाहतूक पोलिसांच्या सांगण्यावरून 500 रुपये वसूल केल्याची कबुली दिली. संतप्त नागरिकांनी “500 रुपये कोणाच्या आदेशाने वसूल केले?” असा प्रश्न विचारला असता, सुरुवातीला तो केवळ “साहेबांच्या आदेशाने” असे म्हणत होता. मात्र, जमावाचा रोष पाहून त्याने अखेर कर्तव्यावर असलेल्या एका वाहतूक पोलिसाचं नाव घेतलं.
यानंतर नागरिकांनी थेट त्या वाहतूक पोलिसाकडे मोर्चा वळवला. या प्रकरणाचा व्हिडिओ पिंपरी–चिंचवड पोलिसांपर्यंत पोहोचला. वाहतूक विभागाचे पोलीस उपायुक्त विवेक पाटील यांनी तत्काळ चौकशीचे आदेश दिले असून, प्राथमिक तपासाअंती संबंधित वाहतूक पोलिसाचे निलंबन करण्याची प्रक्रिया सुरू करण्यात आली आहे. तसेच, वॉर्डनला नोकरीवरून काढण्याचे आदेशही देण्यात आले आहेत.
या घटनेमुळे पोलिस दलाची प्रतिमा पुन्हा एकदा मलीन झाली आहे. विशेष म्हणजे, पिंपरी–चिंचवड परिसरात ट्रॅफिक वॉर्डनकडून हफ्तेखोरी व खंडणी वसुलीची प्रकरणे सर्रास घडतात, अशी स्थानिकांची तक्रार आहे. वाहतुकीवर नियंत्रण ठेवण्यासाठी महापालिकेने या वॉर्डनची नेमणूक केली असून, त्यांच्या वेतनासाठी तब्बल 5 कोटी रुपये खर्च केला जातो. तरीसुद्धा, हेच वॉर्डन नागरिकांच्या खिशावर डल्ला मारत असल्याने रोष व्यक्त केला जात आहे.
“या ट्रॅफिक वॉर्डनना खंडणीखोरीचं लायसन्स नेमकं कोणी दिलं? त्यांच्यावर खंडणीचे गुन्हे का दाखल होत नाहीत?” असा सवाल स्थानिकांकडून केला जात आहे. या संदर्भात पालिकेच्या सुरक्षा विभागाचे प्रमुख उदय जरांडे यांनी आपली भूमिका मांडली असून, पुढील कारवाईसाठी तपास सुरू असल्याचे सांगितले.
