Suicide News: नांदेड : नांदेड शहरातून एक धक्कादायक घटना समोर आली आहे. 16 वर्षांच्या विद्यार्थिनीने राहत्या खोलीत आत्महत्या (Suicide) केल्याने परिसरात हळहळ व्यक्त होत आहे. ही मुलगी दहावीमध्ये शिक्षण घेत होती. एका तरुणासोबत झालेल्या ओळखीमुळे ती मानसिक तणावाखाली होती, अशी माहिती पोलिस तपासात पुढे आली आहे. या प्रकरणी मुख्य आरोपीसह एकूण 5 जणांविरुद्ध गुन्हा नोंदवण्यात आला आहे. (10th grade student death)
मिळालेल्या माहितीनुसार, संबंधित मुलगी किनवट तालुक्यातील असून ती नांदेड शहरात बहिणीसोबत भाड्याच्या खोलीत राहत होती. काही महिन्यांपूर्वी तिची ओळख दीपक सोळंके नावाच्या तरुणाशी झाली. सुरुवातीला दोघांमध्ये मैत्री होती. दरम्यान, आरोपीने मुलीचे काही फोटो आपल्या मोबाईलमध्ये घेतल्याचे सांगितले जात आहे.
काही दिवसांनंतर मुलीने त्याच्याशी बोलणे कमी केले. यामुळे रागावून आरोपीने तिला लग्नासाठी दबाव टाकल्याचा आरोप आहे. लग्नास नकार दिल्यास फोटो सोशल मीडियावर टाकण्याची धमकी दिली जात होती, असे कुटुंबीयांनी तक्रारीत नमूद केले आहे. या सततच्या त्रासामुळे आणि बदनामीच्या भीतीने ती मानसिक तणावात होती.
23 फेब्रुवारीच्या रात्री तिने खोलीत ओढणीच्या सहाय्याने गळफास घेतला. ही बाब समोर आल्यानंतर कुटुंबीयांनी नांदेड गाठले. वडिलांच्या तक्रारीवरून भाग्यनगर पोलीस ठाण्यात दीपक सोळंके, पवन साळुंके, करण साळुंके, विष्णू साळुंके आणि शंकर साळुंके यांच्याविरुद्ध आत्महत्येस प्रवृत्त केल्याचा गुन्हा दाखल करण्यात आला आहे.
पोलिसांनी पुढील तपास सुरू केला असून आरोपींवर कठोर कारवाई करण्याची मागणी नातेवाईकांनी केली आहे.
