पुणे : कपड्याच्या दुकानात खरेदीसाठी आलेल्या एका व्यक्तीने सेल्समन तरुणीसमोर अश्लील कृत्य केल्याचा धक्कादायक प्रकार कोरेगाव पार्क परिसरातून उघडकीस आला आहे. ही घटना बुधवारी (ता. १४) रोजी दुपारी सव्वाचारच्या सुमारास घडली आहे.
याप्रकरणी २३ वर्षीय तरुणीने कोरेगाव पार्क पोलिस ठाण्यात फिर्याद दिली आहे. त्यानुसार एका अनोळखी व्यक्तीविरुद्ध विनयभंग केल्याचा गुन्हा दाखल केला आहे.
पोलिसांनी दिलेल्या माहितीनुसार, फिर्यादी तरुणी कोरेगाव पार्क परिसरातील एका कपड्याच्या दुकानात सेल्समन म्हणून काम करतात. बुधवारी (ता. १४) दुपारी दुकानात एक व्यक्ती कपडे खरेदी करण्याच्या बहाण्याने आली होती. आरोपीने कपडे ट्रायल करण्याच्या रूमकडे जाताना फियादी तरुणीकडे पाहून इशारा करून त्यांच्यासमोरच अश्लील कृत्य केले.
दरम्यान, हा प्रकार घडल्यानंतर तरुणीने कोरेगाव पार्क पोलिस ठाण्यात धाव घेत फिर्याद दिली. त्यानुसार पोलिसांनी अनोळखी व्यक्तीविरुद्ध विनयभंग केल्याचा गुन्हा दाखल केला असून या घटनेचा पुढील तपास पोलीस करीत आहे.
