नवी मुंबई: नवी मुंबईतील एका खासगी शाळेतील शिक्षिकेविरोधात अल्पवयीन विद्यार्थ्यासोबत अश्लील व्हिडीओ कॉल केल्याचा धक्कादायक प्रकार उघडकीस आला आहे. या प्रकरणी कोपरखैरणे पोलीस ठाण्यात पोक्सो कायद्यांतर्गत गुन्हा दाखल करण्यात आला आहे.
सदर शिक्षिका इन्स्टाग्रामवर विद्यार्थ्यासोबत संपर्कात होती. ती व्हिडीओ कॉलद्वारे अर्धनग्न अवस्थेत विद्यार्थ्याला व्हिडीओ कॉल करायची. ही घटना विद्यार्थ्याने त्याच्या पालकांना सांगितल्यानंतर त्यांनी कोपरखैरणे पोलीस ठाणे गाठून तक्रार दिली. त्यानुसार पोलिसांनी तात्काळ कारवाई करत शिक्षिकेवर पोक्सो कायद्यानुसार गुन्हा दाखल केला आणि तिला अटक करण्यात आली.
शिक्षिकेला न्यायालयात हजर केल्यानंतर न्यायालयाने तिला एका दिवसाच्या पोलीस कोठडीत ठेवण्याचे आदेश दिले आहेत. पोलीस सध्या या प्रकरणाचा सखोल तपास करत असून, शाळेतील इतर विद्यार्थ्यांबरोबरही संबंधित शिक्षिकेने अशाच प्रकारचा संवाद साधला होता का, याचा शोध घेत आहेत.
विशेष म्हणजे, काही दिवसांपूर्वीच मुंबईत अशाच स्वरूपाची घटना घडली होती. तेथील एका शाळेतील शिक्षिकेने अल्पवयीन विद्यार्थ्याला कारमधून फाईव्ह स्टार हॉटेलमध्ये नेले होते. त्याला दारू पाजून शारिरीक संबंध ठेवण्यास भाग पाडल्याचा आरोप तिच्यावर ठेवण्यात आला होता. या प्रकाराची चौकशी सुरु असतानाच नवी मुंबईतील ही घटना समोर आल्यामुळे पालक आणि शाळा प्रशासनामध्ये खळबळ उडाली आहे.
