पुणे : पुणे जिल्ह्यातील चाकण येथे अल्पवयीन मुलीच्या कुटुंबियांना जीवे मारण्याची धमकी देत तिच्यावर लैंगिक अत्याचार केल्याची घटना समोर आली आहे. धक्कादायक बाब ही की यामध्ये ही मुलगी गरोदर राहिली आहे. हा प्रकार 5 ऑगस्ट 2022 ते 2 मार्च 2023 या कालावधीत आंबेठाण चौक, चाकण येथे घडला आहे.
याप्रकरणी 17 वर्षीय पीडित मुलीने चाकण पोलीस ठाण्यात फिर्याद दिली आहे. त्यावरून पोलीसांनी संशयित पांडुरंग किसन झाडे (वय 26, रा. चाकण) या तरुणाच्या विरोधात गुन्हा दाखल करून घेतला आहे.
पोलिसांनी दिलेल्या माहितीनुसार, संशयित आरोपी पांडुरंग याने सुरुवातीला पीडित मुलीसोबत जवळीक साधली त्यानंतर तिला फिरायला नेण्याच्या बहाण्याने त्याच्या घरी नेले. तिथे मुलीला तिच्या घरच्यांना जीवे मारून टाकण्याची तसेच तिची बदनामी करण्याची धमकी देऊन तिच्यावर लैंगिक अत्याचार केले. यामध्ये मुलगी गरोदर राहिली असता हा प्रकार उघडकीस आला. याप्रकरणी गुन्हा दाखल करून पोलिसांनी पांडुरंग याला अटक केली आहे. पुढील तपास चाकण पोलीस करीत आहेत.
