पुणे: पिंपरी-चिंचवड महापालिकेच्या एका शाळेतील 13 वर्षीय इयत्ता सातवीच्या विद्यार्थिनीवर आणि तिच्या इतर मैत्रिणींवर अश्लील चाळे केल्याचा धक्कादायक प्रकार उघडकीस आला आहे. या प्रकरणी शाळेतील संशयित शिक्षक संतोष हरिभाऊ बेंद्रे (वय 51, रा. कृष्णानगर, चिखली) याला अटक करण्यात आली आहे. ही घटना 11 जुलै ते 19 जुलै 2025 दरम्यान घडली असून, निगडी पोलिस ठाण्यात 23 जुलै रोजी या प्रकरणी गुन्हा दाखल करण्यात आला.
पोलिसांकडून मिळालेल्या माहितीनुसार, संतोष बेंद्रे हे महापालिकेच्या शाळेत शिक्षक म्हणून कार्यरत असून, त्यांनी पीडित मुलीसोबत व तिच्या इतर मैत्रिणींशी अश्लील चाळे केले. इतकेच नव्हे, तर शाळेतील वॉशरूममध्ये डोकावून पाहत मुलींच्या मनात लज्जा उत्पन्न होईल असे वर्तनही केल्याचे चौकशीत समोर आले आहे. त्यांच्या या वर्तनामुळे मुली मानसिकदृष्ट्या अस्वस्थ झाल्या असून, पालकांनी तक्रार केल्यानंतर ही संपूर्ण घटना उघडकीस आली.
या प्रकरणी आरोपी शिक्षकावर भारतीय न्याय संहिता 2023 चे कलम 74,78,115(2), बालकांचे लैंगिक अत्याचारांपासून संरक्षण करणाऱ्या ‘पॉक्सो कायदा 2012’ अंतर्गत कलम 7,8,9(एफ), 12 तसेच अनुसूचित जाती व जमाती अत्याचार प्रतिबंधक कायद्यानुसार गुन्हा दाखल करण्यात आला आहे. या गंभीर प्रकरणाचा तपास सहाय्यक पोलिस आयुक्त सचिन हिरे करत आहेत.
दरम्यान, पिंपरी-चिंचवड महापालिकेच्या शिक्षण विभागानेही याची गंभीर दखल घेतली असून, पोलिसांनी सादर केलेल्या एफआयआरच्या आधारे प्रशासकीय कारवाईची प्रक्रिया सुरू केली आहे. शिक्षण विभागाचे सहाय्यक आयुक्त किरण मोरे यांनी सांगितले की, “मुख्याध्यापकांकडून यासंदर्भात अहवाल मागवण्यात येणार असून, त्यानंतर संबंधित शिक्षकावर सेवानिलंबनाची कार्यवाही करण्यात येईल.”
हा प्रकार उघडकीस आल्यानंतर परिसरात संतापाची लाट उसळली आहे. विद्यार्थिनींच्या सुरक्षेचा प्रश्न पुन्हा एकदा ऐरणीवर आला असून, शाळांमध्ये अशा प्रकारांच्या विरोधात कठोर उपाययोजना करण्याची मागणी पालकांकडून होत आहे.
