अमित मुंडीक
पुणे: समर्थ पोलीस ठाण्याच्या हद्दीतून चोरीस गेलेल्या मोटारसायकल प्रकरणी पोलिसांनी केलेल्या तपासातून एक मोठं गुन्हेगारी रॅकेट उघडकीस आलं आहे. सुजल जीतेश जगताप (वय २२, रा. राजेवाडी, नाना पेठ) या आरोपीस पोलिसांनी कात्रज परिसरातून शिताफीने अटक केली असून त्याच्याकडून एकूण ५ चोरीच्या दुचाकी जप्त करण्यात आल्या आहेत.
दि. २७ ते २८ जुलै दरम्यान फिर्यादीची यमाहा मोटरसायकल घराबाहेरून चोरीस गेल्याने समर्थ पोलीस ठाण्यात गुन्हा नोंदविण्यात आला होता. तपास पथकाने सीसीटीव्ही फुटेज तपासून, गोपनीय बातमीदारांच्या मदतीने आरोपीची ओळख पटवली आणि त्याला अटक केली.
आरोपी सुजल याने एक विधीसंघर्षीत बालकाच्या मदतीने मोटरसायकल चोरी केल्याची कबुली दिली आहे. त्याच्याकडून समर्थसह बंडगार्डन आणि कोंढवा पोलीस ठाण्यांत दाखल असलेल्या वाहन चोरीचे एकूण ३ गुन्हे उघडकीस आले आहेत. आरोपीकडून एकूण ५ दुचाकी जप्त करण्यात आल्या असून तपास पोलीस उपनिरीक्षक जालिंदर फडतरे करत आहेत.
