पुणे : पतंजली योगपीठशी संबंधित असलेल्या आरोग्य संशोधन केंद्रात झूमवर ऑनलाईन बैठक सुरू असताना पुण्यातून मीटिंगमध्ये सहभागी झालेल्या एका तरुणानं पॉर्न व्हिडीओ सुरू केल्याची घटना घडली आहे. या बैठकीला देश-विदेशातील अनेक जण उपस्थित होते. तर तरुणाने हा प्रकार जाणूनबुजून केला की त्याच्या हातून चुकून घडला हे अद्याप स्पष्ट झालेलं नाही.
या प्रकरणी हरिद्वारच्या बहादराबाद पोलीस ठाण्यात तक्रार दाखल करण्यात आली आहे. तसेच पतंजलीशी संबंधित कमल भदौरिया आणि शिवम वालिया यांनी तक्रार नोंदवली आहे. त्यानुसार पोलिसांनी एका कॉलेज कॅम्पसमध्ये राहणाऱ्या आकाश नावाच्या तरुणाविरोधात गुन्हा दाखल करण्यात आला आहे. हरिद्वार पोलिसांनी माहिती तंत्रज्ञान कायद्याच्या अंतर्गत गुन्हा नोंदवला आहे.
पतंजली योगपीठाशी संबंधित असलेल्या अनेकांची बैठक सुरू होती. देश-विदेशातील अनेक जण महत्त्वपूर्ण विषयांवर ऑनलाईन चर्चा करत होते. महिला देखील मीटिंगमध्ये होत्या. त्यादरम्यान एका तरुणानं अश्लिल व्हिडीओ सुरू केला.
दरम्यान, पतंजलीकडून एक तक्रार नोंदवण्यात आल्याची माहिती एसएसपी अजय सिंह यांनी दिली. आयटी कायद्याच्या अंतर्गत पोलिसांनी गुन्हा दाखल केला असून प्रकरणाचा तपास करून कारवाई करण्याचं आश्वासन पोलिसांनी दिलं आहे.
