बारामती : गावातील पाटलांचा नाद करतो काय या कारणावरून एकाला डोक्यात व पाठीवर कोयत्याने वार करून जीवे मारण्याचा प्रकार घडला आहे. याप्रकरणी माळेगाव पोलिसांनी तीन संशयित आरोपींना ताब्यात घेतले आहे.
स्वप्निल उर्फ पिल्या देऊळकर, नितीन वसंतराव तावरे पाटील, सचिन वसंतराव तावरे पाटील तिघेही (रा. शिवनगर, माळेगाव बु. ता. बारामती) असे ताब्यात घेतलेल्या आरोपींची नावे आहेत.
या प्रकरणी जखमी महेश उत्तमराव पैठणकर (वय-४६,रा. पैठणकर वस्ती, शिवनगर,माळेगाव बु,ता. बारामती, जि. पुणे) यांनी माळेगाव पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, रविवारी (ता. १०) सायंकाळी साडेसात वाजण्याच्या सुमारास शिवनगर परिसरातील श्री तुळजाभवानी मंदिर आहे. या मंदिरात महेश पैठणकर हा दर्शनासाठी गेला होता. यावेळी नितीन पाटील व सचिन पाटील यांच्या नादाला लागतो काय..? असे म्हणत संशयित आरोपी स्वप्निल देऊळकर याने डोक्यात व पाठीवर जिवे मारण्याच्या उद्देशाने महेशवर कोयत्याने प्राणघातक हल्ला केला. हीघटना तुळजाभवानी मंदिरातील सीसीटीव्ही मध्ये कैद झाली आहे.
दरम्यान, या हल्ल्याच्या कटात माजी उपसरपंच सचिन तावरे याचा देखील समावेश असल्याने माळेगाव परिसरात खळबळ उडाली आहे. जखमी महेश पैठणकर यांच्यावर बारामतीत खाजगी दवाखान्यात उपचार सुरू आहेत. या घटनेचा तपास माळेगावचे सहायक पोलिस निरीक्षक राहुल घुगे हे करीत आहेत.
