पुणे : युरोपातील माल्टाध्ये ‘पिझा शेफ’ म्हणून नोकरी देण्याचे आश्वासन देऊन नोकरीस पाठवल्यानंतर, प्रत्यक्षात मात्र बेकरीमध्ये क्लिनिंगची नोकरी लावली. या कामाला तरुणाने नकार दिल्याने ड्रग्जच्या गुन्ह्यात अडकवेल, अशी धमकी दिल्याची धक्कादायक घटना उघडकीस आली आहे. याप्रकरणी एकावर गुन्हा दाखल करण्यात आला आहे.
अनिकेत विश्वास बोथरा (वय. २९, रा. दीप बंगला चौक) असे गुन्हा दाखल करण्यात आलेल्या आरोपीचे नाव आहे. याप्रकरणी एका ३० वर्षीय तरुणाने चतु:श्रृंगी पोलीस ठाण्यात फिर्याद दिली.
पोलिसांनी दिलेल्या माहितीनुसार, एक जाहिरात पाहून फिर्यादी अनिकेतच्या ऑफिसमध्ये गेला होता. आरोपी अनिकेत याचे फर्ग्युसन रोडवर ट्रॅव्हल एजन्सीचे कार्यालय आहे. फिर्यादी तरुणाला अनिकेत याने परदेशात पिझा शेफ या पदावर नोकरी देतो, असे सांगितले. तरुणाचा पुण्यात स्नॅक्स सेंटरचा व्यवसाय आहे. नोकरी मिळाल्यानंतर ११०० युरो पगार मिळेल, असे सांगितले. त्यानुसार त्याला अगोदर साडेसहा लाख रुपये खर्च सांगण्यात आला.
प्रत्यक्षात त्यांना अन्य खर्चही तुम्हालाच करावा लागेल, असे सांगून त्यांच्याकडून साडेनऊ लाख रुपये घेतले. त्यांना जानेवारी २०२३ मध्ये माल्टा येथे पाठविले. तेथे गेल्यावर त्यांना पिझा शेफऐवजी एका बेकरीमध्ये क्लिनिंगचा जॉब दिला. तसेच पगार ९०० युरो दिला. त्याला त्यांनी नकार दिला, तर ड्रग्जच्या केसमध्ये अडकवेल, अशी धमकी दिली. तसेच इथून पळून गेला तर कुटुंबाची आठवण आली म्हणून गेला, असे वर्क परमिटवर नमूद करेन, अशी धमकी दिली.
त्यानंतर फिर्यादी याने आपल्या बहिणीला फोन करून ही सर्व माहिती सांगितली. तिने भारतीय दुतावासाशी संपर्क साधला. हा तरुणही भारतीय दुतावासात गेला. त्यांच्या मदतीने तो भारतात परत आला. त्यानंतर त्यांनी पोलिसांकडे फिर्याद दिली त्यानुसार आरोपी अनिकेत बोथरा याच्यावर गुन्हा दाखल करण्यात आला असून या घटनेचा पुढील तपास पोलीस करीत आहेत.
