Leopard Attack : पालघरच्या विक्रमगड तालुक्यात एक धक्कादायक घटना घडली आहे. उटावली आदर्श विद्यालयात शिकणाऱ्या ११ वर्षांच्या विद्यार्थ्यावर बिबट्याने हल्ला केला. पण त्या मुलाने आणि सोबतच्या शाळकरी मित्रांनी दाखवलेल्या धाडसामुळे मोठा अनर्थ टळला. सध्या सगळीकडे या मुलांच्या धैर्याचं कौतुक होत आहे.
नेमकं काय घडलं?
मयंक विष्णु कुवरा (वय 11) हा शाळा सुटल्यानंतर नेहमीप्रमाणे जंगल रस्त्याने घरी जात होता. घर शाळेपासून चार किलोमीटर अंतरावर आहे. रस्त्याने जाणाऱ्या मयंकवर तेवढ्यात अचानक बिबट्याने झडप घातली. हल्ला होताच मयंक आरडाओरड करू लागला आणि जोरात प्रतिकार केला. त्याच्या सोबत असलेल्या दुसऱ्या मुलाने बिबट्यावर दगड फेकायला सुरुवात केली. आरडाओरडा करायला लागली. या मुलांच्या आरडाओरड्याचा आवाज ऐकून जवळचे गावकरी धावत आले आणि ते पाहताच बिबट्या जंगलात पळून गेला. बिबट्याचे वार थेट मयंकच्या दप्तरावर बसल्याने त्याचा जीव वाचला; पण नखाचे घाव हाताला रुतल्याने खोल जखमा झाल्या.
या भागात काही दिवसांपासून बिबट्या फिरत असल्याची चर्चा होती. गावकऱ्यांनी सोशल मीडियावर त्याचे व्हिडिओही पोस्ट केले होते. तरीही शाळकरी मुलांना जंगलातूनच प्रवास करावा लागत असल्याने सर्वांमध्ये भीतीचं वातावरण आहे.
जखमी मयंकचा उपचार विक्रमगड ग्रामीण रुग्णालयात सुरू असून खोल जखमेवर टाके घालण्यात आले आहेत. या घटनेनंतर गावकऱ्यांनी वनविभागाला तातडीने कारवाईची मागणी केली आहे. शाळा परिसर आणि जंगल भागात गस्त वाढवावी आणि मुलांच्या येण्या-जाण्याच्या रस्त्यावर सुरक्षा द्यावी, अशी मागणी करण्यात आली आहे.
दरम्यान, बिबट्याला पळवून लावणाऱ्या मुलांच्या धाडसाचं सगळीकडे कौतुक होत आहे.
