(Khadakwasla Dam ) खडकवासला, (पुणे) : खडकवासला धरणाच्या कॅनॉलमध्ये पोहण्यासाठी पाण्यात उतरलेल्या एका १२ वर्षीय मुलाचा बुडून मृत्यू झाल्याची घटना वडगाव बुद्रुक परिसरात घडली आहे. बुधवारी दुपारी दोन वाजण्याच्या सुमारास ही घटना घडली आहे. या घटनेनं परिसरात एकच खळबळ उडाली होती.
लोकेश प्रवीण येवले (वय १२, वडगाव बुद्रुक) असं मृत झालेल्या मुलाचे नाव असूनपाण्याचा अंदाज न आल्याने त्याचा मृत्यू झाला आहे.
मिळालेल्या माहितीनुसार…!
लोकेश येवले आणि त्याचा मित्र बुधवारी दुपारी दोन वाजेच्या सुमारास खडकवासला कॅनॉलमध्ये पोहण्यासाठी उतरले होते. कॅनॉलचे पाणी वाहते असल्याने लोकेशला पाण्याचा अंदाज आला नाही. तर त्याच्यासोबत असलेला मित्र कसाबसा बाहेर पडला. मात्र, लोकेशचा पाण्यात वाहून त्याचा बुडून मृत्यू झाला. या घटनेची माहिती अग्निशामक दलाच्या जवानांना मिळताच त्यांनी तात्काळ घटनास्थळी धाव घेत मुलाला शोधण्याचा प्रयत्न केला. मात्र, अद्यापर्यंत लोकेशचा मृतदेह सापडला नाही.
कॅनॉलच्या वाहत्या पाण्यात पोहायला जाताना काळजी घेणे गरजेचं आहे. चांगले पोहता येत असेल तरच पाण्यात उतरावे. अन्यथा नको ते धाडस जीवावर बेतू शकते. त्यामुळे आपल्या मुलांना पोहायला पाठवताना तो कुणासोबत जात आहे. त्याच्या सहकाऱ्याला चांगले पोहता येते का, या सर्व गोष्टी पडताळून पाहणे गरजेचं आहे. अन्यथा जीव गमवावा लागू शकतो, असं आवाहन पोलिसांकडून करण्यात आलं आहे.
