सोलापूर : पत्नीच्या डोळ्यांना गंभीर आजार असल्याने तुझ्यापासून जन्माला येणारी संततीही आंधळी जन्माला येईल. असे म्हणत डॉक्टर पत्नीला शारीरिक व मानसिक त्रास दिल्या प्रकरणी पतीसह सहाजणांवर गुन्हा दाखल करण्यात आला आहे.
याप्रकरणी स्वाती धनराज करचे (वय २८, रा. फलटण) यांनी विजापूर नाका पोलीस ठाण्यात फिर्याद दिली आहे. त्यानुसार पोलिसांनी पती धनराज किसन करचे, सासरे किसन दगडू करचे, सासू शर्मिला किसन करचे, दीर महेश किसन करचे, स्नेहल महेश करचे, संगीता नाना करचे यांच्यावर कौटुंबिक हिंसाचाराचा गुन्हा दाखल केला आहे.
पोलिसांनी दिलेल्या माहितीनुसार, स्वाती करचे यांचा विवाह आरोपी पती धनराज किसन करचे यांच्याशी २०२१ मध्ये झाला होता. लग्नानंतर काही दिवसांनी तुला डोळ्यांचा गंभीर आजार आहे. त्या आजारावर इलाज अशक्य आहे. तू पुढे जाऊन आंधळी होशील. शिवाय तुझ्यापासून होणारी संतती देखील आंधळी जन्म घेईल, असे म्हणत स्वाती यांना पती धनराज करचे याने हाताने, काठीने व लाथाबुक्क्यानी मारहाण केली.
दरम्यान, स्वातीने बी.एच.एम.एस. कोर्स केल्याने कुठे तरी नोकरी करेन असे म्हटल्यामुळे कुटुंबातील सदस्यांनी विरोध करीत बेडरूममध्ये कोंडले. यानुसार विजापूर नाका पोलीस ठाण्यात वरील सहा जणांच्या विरोधात कौटुंबिक हिंसाचाराचा गुन्हा दाखल करण्यात आला आहे.
