Delhi Blast update : दिल्ली ब्लास्ट प्रकरणात NIA ने मोठी कारवाई केली. या कारवाईने अनेक धक्कादायक खुलासे समोर आले आहेत. या कारवाईत आमिर रशीद अली या आरोपील याला अटक करण्यात आली. त्यानेच दिल्लीत i20 कार खरेदी केली होती. हीच गाडी ब्लास्टसाठी वापरली गेली होती. अशी माहिती समोर आली. NIA च्या तपासात अनेक धक्कादायक खुलासे समोर आले आहेत.
डॉ. उमरसोबत मिळून कट
आमिर हा मूळचा जम्मू–काश्मीरमधील पुलवामा येथील असून प्लंबर म्हणून काम करत होता. तपासात असं समोर आलं आहे की आमिरने डॉ. उमर उन नबी सोबत मिळून दिल्लीत मोठा कट रचला होता. ब्लास्टमध्ये आत्मघातकी हल्लेखोराने कारमध्ये IED बसवून स्फोट घडवला. यात 13 जणांचा मृत्यू झाला आणि 32 जण जखमी झाले. तपासात समोर आलेल्या माहितीनुसार i20 कार आमिरच्या नावावर असल्याचं समोर आलं आहे. गाडी खरेदी करण्यासाठी तो काही दिवसांपूर्वी दिल्लीला आला होता. फॉरेन्सिक तपासात कार चालवणाऱ्या आत्मघातकी हल्लेखोराची ओळख डॉ. उमर उन नबी अशी झाली आहे. तो फरीदाबादमधील अल फलाह विद्यापीठात सहाय्यक प्राध्यापक होता. एनआयएने त्याची आणखी एक गाडीही जप्त केली आहे. या प्रकरणात अटक केलेल्या तीन डॉक्टरांसह चार जणांना एनआयएने चौकशीनंतर सोडून दिलं. त्यांचा मुख्य आरोपी उमरशी काही ठोस संबंध आढळला नाही.
अनेक पोलिस पथकांचा तपास सुरू
दिल्ली, हरियाणा, यूपी आणि जम्मू–काश्मीर पोलिसांनी मिळून आतापर्यंत 73 साक्षीदारांची चौकशी केली आहे. अधिकारी अजूनही या हल्ल्याच्या मागचा मोठा कट उघड करण्याचा प्रयत्न करत आहेत आणि हल्ल्यात सहभागी असलेल्या सर्वांची ओळख पटवण्यासाठी तपास सुरू आहे.
