Crime : सोलापुरातून एक हृदय पिळवटून टाकणारी घटना समोर आली आहे. आपल्या दोन चिमुकल्या मुलांसोबत शेवटचा सेल्फी काढून एका पोलीस पत्नीने आपलं आयुष्य संपवलं आहे. पती पोलीस ठाण्यात कर्तव्यावर असतानाच पत्नीने घरी हे टोकाचं पाऊल उचलल्याने परिसरात मोठी हळहळ व्यक्त होत आहे. (Crime)
नेमकं काय घडलं?
सोलापूरच्या विजापूर नाका पोलीस ठाण्यात कार्यरत असलेले पोलीस कर्मचारी सिलसिद्ध सलगर यांची मंगळवारी रात्री ‘नाईट ड्युटी’ होती. त्यामुळे ते कामावर गेले होते. घरी त्यांची पत्नी अश्विनी आणि दोन लहान मुले होती. मध्यरात्रीच्या सुमारास जेव्हा दोन्ही मुलं गाढ झोपेत होती, तेव्हा अश्विनी यांनी मुलांसोबत एक सेल्फी घेतला. त्यानंतर त्यांनी आपल्या एका नातेवाईकाला फोन करून “मी आत्महत्या करतेय” असं सांगितलं. अश्विनी आधीही अनेकदा रागाच्या भरात असं बोलायच्या, त्यामुळे नातेवाईकांनी ही केवळ धमकी असावी असं समजून त्याकडे सुरुवातीला दुर्लक्ष केलं.
पहाटे उघड झाला प्रकार
पहाटे ४ वाजता जेव्हा नातेवाईकांनी अश्विनी यांचा मेसेज पाहिला, तेव्हा त्यांना संशय आला. त्यांनी तातडीने अश्विनी यांच्या पतीला फोन करून माहिती दिली. सिलसिद्ध यांनी पत्नीला वारंवार फोन लावला, पण प्रतिसाद मिळाला नाही. घाबरलेल्या अवस्थेत त्यांनी घर गाठलं, तेव्हा दरवाजा आतून बंद होता. शेजाऱ्यांच्या मदतीने दरवाजा तोडून आत पाहिले असता अश्विनी यांनी गळफास घेतल्याचं दिसून आलं.
पोलीस ठाण्यातच दुखाची नोंद
त्यांना तातडीने रुग्णालयात नेण्यात आलं, पण दुर्दैवाने उपचारापूर्वीच त्यांचा मृत्यू झाला होता. विशेष म्हणजे, ज्या पोलीस ठाण्यात सिलसिद्ध नोकरीला आहेत, त्याच विजापूर नाका पोलीस ठाण्यात आपल्या पत्नीच्या मृत्यूची नोंद करण्याची दुर्दैवी वेळ त्यांच्यावर आली. अश्विनी यांनी इतक्या टोकाचा निर्णय का घेतला, याचं कारण अजून समजू शकलेलं नाही. पोलीस या प्रकरणाचा तपास करत आहेत.
