पुणे : नियोजित गृहप्रकल्पात पाण्याच्या टाकीची भिंत कोसळून एका मजुराचा मृत्यू झाल्याची घटना घडली आहे. ही घटना प[पुण्यातील बाणेर-पाषाण रस्त्यावर घडली आहे. तर, या दुर्घटनेत एक मजूर गंभीर जखमी झाला आहे . या घडलेल्या दुर्घटनेस जबाबदार ठरल्या प्रकरणी ठेकेदारासह दोघांच्या विरोधात चतु:शृंगी पोलिसांनी गुन्हा दाखल करण्यात आला आहे.
रोहन रामचंद्र घाडे (वय २६ रा. सुखसागरनगर, बिबवेवाडी) असे मृत्युमुखी पडलेल्या मजुराचे नाव आहे. आशिष बिंद असे गंभीर जखमी झालेल्या मजुराचे नाव आहे. रवींद्र डंडे, गोविंद राम सोनटक्के असे गुन्हा दाखल करण्यात आलेल्या ठेकेदाराचे नाव आहे. याप्रकणी रोहनचा भाऊ रोशन (वय २०) यांनी फिर्याद दिली आहे.
पोलिसांनी दिलेल्या माहिती नुसार, बाणेर- पाषाण लिंक रस्त्यावर माऊट क्लेअर या गृहप्रकल्पाचे काम सुरू आहेत. गृहप्रकल्पातील टाकीच्या भिंतीचे काम रोहन आणि आशिष करत होते. त्यावेळी अचानक भिंत दोघांच्या अंगावर कोसळली. दुर्घटनेत रोहन आणि आशिष जखमी झाले. दरम्यान, रोहन आणि आशिषलला रुग्णालयात दाखल करण्यात आले. उपचारादरम्यान रोहनचा मृत्यू झाला. दुर्घटनेस जबाबदार ठरल्या प्रकरणी ठेकेदारांच्या विरोधात गुन्हा दाखल करण्यात आला असून या घटनेचा पुढील तपास पोलीस करीत आहेत.
