पुणे : पुणे रेल्वे स्थानक परिसरात मेफेड्रोनची विक्री करणाऱ्याला अंमली पदार्थ विरोधी पथकाने अटक केली आहे. त्याच्याकडून मेफेड्रोनसह तब्बल १२ लाखाचा मुद्देमाल जप्त करण्यात आला आहे.
धीरज राजेश कांबळे (वय २२, रा. लक्ष्मीनगर, येरवडा) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, नववर्षाच्या पार्श्वभूमीवर अमली पदार्थ विरोधी पथकाने शहरात अमली पदार्थ विक्री करणाऱ्यांवर कडवी नजर ठेऊन होते. पथक शहरात गस्त घालत असताना, पोलिसांना आरोपी कांबळे हा पुणे रेल्वे स्थानक परिसरात मेफेड्रोन विक्रीसाठी येणार असल्याची माहिती एका खबऱ्यामार्फत मिळाली.
खबऱ्याकडून मिळालेल्या माहितीची खातरजमा करत, मिळालेल्या माहितीच्या अनुषंगाने पोलिसांनी सापळा रचून आरोपीला मोठ्या शिताफीने अटक केली. त्याच्याकडून मेफेड्रोन, मोबाइल संच, दुचाकी, रोकड, इलेक्ट्रॅानिक वजनकाटा असा ११ लाख ७३ हजार रुपयांचा मुद्देमाल जप्त करण्यात आला.
ही कारवाई पोलीस उपायुक्त अमोल झेंडे, सहायक आयुक्त नारायण शिरगावकर यांच्या मार्गदर्शनाखाली पोलीस निरीक्षक सुनील थोपटे, उपनिरीक्षक दिगंबर चव्हाण, संतोष देशपांडे, प्रशांत बोमादंडी, योगेश मांढरे आणि संदीप जाधव यांच्या पथकाने केली.
