बेळगाव: बेळगाव शहरात सोशल मीडियाच्या (Crime News) माध्यमातून श्रीमंत लोकांना जाळ्यात अडकवून लुटणाऱ्या हनी ट्रॅप प्रकरणाचा पोलिसांनी पर्दाफाश केला आहे. टिळकवाडी पोलिसांनी या प्रकरणात एका फॅशन डिझायनर महिलेला अटक केली असून तिचा साथीदार अद्याप फरार आहे. या कारवाईदरम्यान पोलिसांनी आरोपींकडून सुमारे 32 लाख 86 हजार रुपयांचा मुद्देमाल जप्त केला आहे. (Latest Marathi News)
दीपा अवतगी (वय 33, रा. महालिंगपूर, जि. बागलकोट) असे अटक करण्यात आलेल्या महिलेचे नाव आहे. तर या प्रकरणातील तिचा साथीदार शिवानंद मठपती हा फरार असून पोलिसांकडून त्याचा शोध सुरू आहे. शिवानंद हा बेळगाव जिल्ह्यातील हुक्केरी तालुक्यातील रहिवासी असल्याची माहिती पोलिसांनी दिली.
पोलिसांच्या तपासानुसार, आरोपी दीपा अवतगी आणि शिवानंद मठपती हे दोघे मिळून श्रीमंत लोकांना लक्ष्य करत होते. शिवानंद विविध मार्गाने आर्थिकदृष्ट्या सक्षम व्यक्तींची माहिती गोळा करून ती दीपाला देत असे. त्यानंतर दीपा सोशल मीडियावरील इंस्टाग्राम आणि फेसबुकसारख्या प्लॅटफॉर्मद्वारे त्या व्यक्तींशी ओळख वाढवत असे. काही दिवस गप्पा मारून ती त्यांच्याशी जवळीक निर्माण करत असे आणि नंतर बेळगाव शहरातील एका लॉजमध्ये भेटण्यासाठी बोलवत असे.
पीडित व्यक्ती लॉजमध्ये आल्यानंतर दीपा त्याला आंघोळ करून येण्यास सांगत असे. संबंधित व्यक्ती बाथरूममध्ये गेल्यानंतर ती बाहेरून दरवाजा बंद करून त्याचा मोबाईल, पैसे आणि वाहनाच्या चाव्या घेऊन पळून जात असे. या प्रकाराची दृश्ये सीसीटीव्ही कॅमेऱ्यातही कैद झाली आहेत. त्यानंतर ती वेगळ्या नंबरवरून फोन करून पैसे देण्याची मागणी करत असे. पैसे न दिल्यास गुन्हा दाखल करण्याची किंवा बदनामी करण्याची धमकी दिली जात असल्याची माहिती तपासात समोर आली आहे.
या प्रकरणी टिळकवाडी पोलीस ठाण्यात गुन्हा दाखल करण्यात आला असून निरीक्षक परशुराम पूजेरी यांच्या नेतृत्वाखालील पथकाने तपास करत दीपाला अटक केली. पोलिसांनी तिच्याकडून एक फॉर्च्युनर कार, एक मारुती सुझुकी एस-क्रॉस कार, 11 मोबाईल फोन, एक टॅब, एक डोंगल, तीन गाड्यांच्या चाव्या आणि 14000 रुपये रोख असा एकूण 32 लाख 86 हजार रुपयांचा मुद्देमाल जप्त केला आहे.
सोशल मीडियाच्या माध्यमातून वाढणाऱ्या अशा फसवणुकीच्या घटनांमुळे नागरिकांनी अनोळखी व्यक्तींशी संपर्क करताना सावधगिरी बाळगण्याचे आवाहन पोलिसांनी केले आहे. या प्रकरणातील फरार आरोपीचा शोध सुरू असून पुढील तपास सुरू आहे.
