नागपूर: नाशिकच्या अशोक खरात प्रकरणाने संपूर्ण महाराष्ट्र हादरलेला असतानाच, नागपुरातून माणुसकीला काळीमा फासणारी अशीच एक घटना समोर आली आहे. बेपत्ता पतीचा शोध लावून देण्याच्या नावाखाली एका 65 वर्षीय भोंदूबाबाने विवाहितेवर अत्याचार केल्याचा धक्कादायक प्रकार उघडकीस आला आहे. सक्करदरा पोलिसांनी या नराधम भोंदूला अमरावतीतून बेड्या ठोकल्या आहेत.
नागपूरमधील सक्करदरा परिसरात राहणारी पीडित महिला एका खासगी संस्थेत काम करते. गेल्या ऑक्टोबर महिन्यापासून तिचे पती बेपत्ता आहेत. पतीचा पत्ता लागत नसल्याने ही महिला प्रचंड मानसिक दडपणाखाली होती. अशातच एका लग्नकार्यात तिची ओळख ताहीर बेग या भोंदूबाबाशी झाली. महिलेने आपली व्यथा सांगितल्यानंतर, “पूजा केल्यास तुझा पती सुखरूप परत येईल,” असे ताहीरने तिला सांगितले.
पूजेचा बहाणा करून ताहीर महिलेच्या घरी गेला. पती परत येईल या आशेने तिने आरोपीवर विश्वास ठेवला, मात्र ताहीरने तिच्यावर अत्याचार केला. महिला स्वतःला वाचवण्याचा प्रयत्न करत होती. तेव्हा आरोपीने आरडाओरडा केल्यास, याबद्दल कोणाला सांगितल्यास “देवाचा प्रकोप होईल आणि तुझा पती कधीच मिळणार नाही,” अशी धमकी देऊन तिचे तोंड दाबण्याचा प्रयत्न केला.
