Crime News: नागपूर : नागपूर जिल्ह्यातील खापरखेडा परिसरात गुरुवारी सकाळी घडलेल्या एका धक्कादायक हत्येच्या घटनेमुळे परिसरात भीतीचे वातावरण निर्माण झाले आहे. खापरखेडा-कोराडी रस्त्यावर पती-पत्नीने मिळून एका तरुणावर चाकूने वार करून त्याची हत्या केल्याची घटना उघडकीस आली. या प्रकरणात पोलिसांनी दोघांनाही ताब्यात घेतले असून पुढील तपास सुरू आहे.
मृत तरुणाची ओळख सागर वानखेडे अशी झाली आहे. तो सावंगी येथील रहिवासी होता आणि कामानिमित्त पुणे येथे राहत असल्याची माहिती मिळाली आहे. आरोपी राजू गजभिये आणि त्याची पत्नी सोनाली गजभिये हे खापरखेडा येथील रहिवासी आहेत.
प्राथमिक माहितीनुसार, शिक्षणाच्या काळात सोनाली आणि सागर यांच्यात ओळख होती. नंतर सोनालीचे लग्न राजू गजभिये याच्यासोबत झाले. तरीही सागर आणि सोनाली यांच्यात संपर्क असल्याची शंका राजूला होती. यामुळे यापूर्वीही त्याने पोलिस ठाण्यात तक्रार दिल्याचे सांगितले जाते.
होळीच्या निमित्ताने सागर पुण्यावरून आपल्या गावी आला होता. त्यानंतर त्याने सोशल मीडियावरून सोनालीला भेटण्यासाठी बोलावले. गुरुवारी सकाळी सुमारे 10 वाजता सागर खापरखेडा येथे पोहोचला. दोघे दुचाकीवरून जात असताना रस्त्यात सोनालीने मुद्दाम पर्स खाली पाडली. सागर पर्स उचलण्यासाठी थांबताच सोनालीने त्याच्यावर चाकूने वार केला. त्याच वेळी मागून आलेल्या राजूनेही त्याच्यावर हल्ला केला. या हल्ल्यात सागरचा घटनास्थळीच मृत्यू झाला.
घटना घडल्यानंतर दोघेही घरी परतले. नंतर पोलिस ठाण्यात जात असताना पोलिसांनी त्यांना ताब्यात घेतले. चौकशीदरम्यान दोघांनीही गुन्ह्याची कबुली दिल्याची माहिती पोलिसांनी दिली आहे.
