मालेगाव: राज्यातील 29 महानगरपालिकांसाठी (Malegaon Voting 2026) आज 15 जानेवारी रोजी मतदान प्रक्रिया सुरू असतानाच मालेगावमध्ये घडलेल्या एका (Malegaon Mahapalika Election) धक्कादायक घटनेने संपूर्ण निवडणूक प्रक्रियेवर प्रश्नचिन्ह निर्माण केले आहे. मालेगाव महापालिकेच्या निवडणुकीदरम्यान एका मतदान केंद्राजवळील घरात तब्बल 200 हून अधिक मतदान ओळखपत्रे (Voter ID Cards) सापडल्याने शहरात मोठी खळबळ उडाली आहे. ही मतदान कार्डे बोगस असण्याचा संशय व्यक्त केला जात असून प्रशासनाने तातडीने कारवाई सुरू केली आहे. (Latest Marathi News)
मिळालेल्या माहितीनुसार, ही मतदान कार्डे मतदान केंद्रालगत असलेल्या एका घरात सापडली. स्थानिक नागरिकांच्या लक्षात ही बाब आल्यानंतर निवडणूक प्रशासनाला माहिती देण्यात आली. त्यानंतर पोलिस व निवडणूक अधिकाऱ्यांनी घटनास्थळी धाव घेत कार्डे जप्त केली असून पंचनामा करण्यात आला आहे. या कार्डांचा वापर मतदार फसवणूक किंवा बनावट मतदानासाठी होणार होता का, याचा तपास सुरू आहे. उमेदवारांकडून घटनास्थळीच सविस्तर चौकशी आणि पंचनामा करण्याची मागणी करण्यात येत आहे.
दरम्यान, मालेगाव पूर्व भागातील बडी हायस्कूल येथे प्रभाग क्रमांक 15 आणि 17 साठी 30 ते 40 मतदान केंद्र एकाच ठिकाणी असल्याने मतदारांची मोठी धावपळ सुरू आहे. अनेक मतदारांना आपले केंद्र शोधण्यात अडचणी येत असल्याने शहरातील काही तरुणांनी स्वतःहून मतदान केंद्रांचा नकाशा तयार करून नागरिकांना मदत करण्याचा पुढाकार घेतला आहे.
मतदार यादीतील मोठ्या प्रमाणावरील घोळामुळे मतदानाची टक्केवारी घटत असल्याचा आरोप इस्लाम पार्टीचे माजी आमदार आसिफ शेख यांनी केला आहे. त्यांनी याबाबत राज्य निवडणूक आयोगाकडे तक्रार केल्याचे सांगत नागरिकांना मोठ्या संख्येने मतदान करण्याचे आवाहन केले आहे.
दुसरीकडे, शालेय शिक्षण मंत्री दादा भुसे यांनी कुटुंबासह मतदानाचा हक्क बजावत मतदारांना मतदानासाठी बाहेर पडण्याचे आवाहन केले.
मालेगावमधील ही घटना केवळ एका शहरापुरती मर्यादित नसून, संपूर्ण राज्यातील निवडणूक यंत्रणेच्या पारदर्शकतेवर प्रश्न उपस्थित करणारी आहे. निवडणुकीसारख्या लोकशाहीच्या पवित्र प्रक्रियेत अशा प्रकारच्या घटना घडणे ही गंभीर बाब असून प्रशासनाने याची सखोल चौकशी करून दोषींवर कठोर कारवाई करणे अत्यावश्यक आहे.
