बीड : मराठा आंदोलक मनोज जरांगे पाटील यांनी पुन्हा एकदा आमरण उपोषण सुरू केलं आहे. आज त्यांच्या उपोषणाचा सातवा दिवस आहे. मनोज जरांगे यांनी सात दिवसापासून अन्न पाण्याचा त्याग केला आहे. त्यामुळे जरांगेंची प्रकृती खालावली आहे. यावरून मराठा समाज आक्रमक झाला आहे. बीडच्या पाडळशिंगी परिसरामध्ये मराठा आंदोलकांनी पुन्हा एकदा एसटी बसेसला टार्गेट केलं आहे.
तर धाराशिवमध्येही अज्ञातांकडून एसटी बसवर दगडफेक करण्यात आली असून खबरदारी म्हणून महामंडळाने लालपरीची सेवा बंद करण्याचा निर्णय घेण्यात आला आहे. पुढील आदेश येईपर्यंत एसटी बसेस सोडल्या जाणार नाहीत, असे बोर्ड बस स्थानकावर लावण्यात आले आहेत. धाराशिव बस स्थानकातून सुटणाऱ्या बस शुक्रवारी सकाळपासून बंद ठेवण्यात आल्या आहेत.
लालापारीची सेवा ठप्प
बीड बसस्थानकातून सुटणाऱ्या एसटी बसेसही शुक्रवारी बंद ठेवण्यात आल्या आहेत. लालपरी एसटी बसेसची सेवा ठप्प झाल्याने सर्वसामान्य प्रवाशांचे पुन्हा एकदा हाल होत आहेत. खाजगी वाहनधारकांकडून प्रवाशांची आर्थिक लूट देखील केली जात आहे. अव्वाच्या-सव्वा भाडे आकरले जात असल्याने प्रवाशांना मनस्ताप सहन करावा लागत आहेत. सरकारने मराठा आरक्षणावर कायमचा तोडगा काढावा, अशी मागणी प्रवासी आणि नागरिकाकडून होत आहे.
