बुलढाणा: डिजिटल तंत्रज्ञानाचा गैरवापर (Crime News) करून एका विवाहित शिक्षिकेला ब्लॅकमेल करत तिच्यावर अत्याचार केल्याची धक्कादायक घटना बुलढाणा जिल्ह्यात उघडकीस आली आहे. मोबाईल हॅक करून त्यातील खासगी फोटो आणि व्हिडिओच्या आधारे महिलेचे मानसिक व लैंगिक शोषण केल्याचा आरोप असून या प्रकरणी सोनाळा पोलीस ठाण्यात गुन्हा दाखल करण्यात आला आहे. ऋषिकेश गिरी (वय 27) असे या आरोपीचे नाव असून तो सध्या फरार आहे. (Latest Marathi News)
मिळालेल्या माहितीनुसार, पीडित महिला शिक्षिका असून आरोपीने तिचा मोबाईल हॅक केल्याचा आरोप आहे. हॅकिंगच्या माध्यमातून त्याने तिच्या व्हॉट्सअॅप चॅट्स, ईमेल आणि मोबाईल गॅलरीतील खासगी फोटो व व्हिडिओ मिळवले. त्यानंतर हे फोटो पती आणि नातेवाईकांना पाठवून बदनामी करण्याची धमकी देत आरोपीने तिला ब्लॅकमेल करण्यास सुरुवात केली.
तक्रारीनुसार, आरोपीने वारंवार धमक्या देत व्हिडिओ कॉलद्वारे तिला विवस्त्र होण्यास भाग पाडले. या व्हिडिओ कॉलचे स्क्रीन रेकॉर्डिंग करून ते पुढे तिच्या नातेवाईकांनाही पाठवण्यात आल्याचा आरोप करण्यात आला आहे. इतकेच नव्हे तर आरोपीने “माझ्याशी शारीरिक संबंध ठेवले नाहीस तर तुला आणि तुझ्या मुलाला ठार मारीन,” अशी धमकी दिल्याचेही तक्रारीत नमूद करण्यात आले आहे.
या सततच्या मानसिक त्रास आणि ब्लॅकमेलिंगला कंटाळून अखेर पीडित शिक्षिकेने पोलिसांकडे धाव घेत तक्रार दाखल केली. घटनेचे गांभीर्य लक्षात घेऊन सोनाळा पोलिसांनी तातडीने गुन्हा नोंदवला आहे. आरोपीविरुद्ध भारतीय न्याय संहिता (BNS 2023) तसेच माहिती तंत्रज्ञान कायद्यांतर्गत विविध गंभीर कलमांनुसार गुन्हा दाखल करण्यात आला आहे.
दरम्यान, आरोपी सध्या फरार असून पोलिसांकडून त्याचा शोध सुरू आहे. या घटनेमुळे सायबर सुरक्षेचा आणि महिलांच्या सुरक्षिततेचा प्रश्न पुन्हा एकदा चर्चेत आला असून मोबाईल आणि डिजिटल माध्यमांचा गैरवापर किती धोकादायक ठरू शकतो, याकडे लक्ष वेधले जात आहे.
