मुंढवा : निर्जनस्थळी नागरिकांना गाठून मोबाईल फोनची जबरी चोरी करणाऱ्या चांडाळ चौकडीला मुंढवा पोलिसांनी बेड्या ठोकल्या आहेत. वरिष्ठ पोलीस निरीक्षक महेश बोळकोटगी यांच्याकडून मुंढवा हद्दीत कायदा व सुव्यवस्था राखण्यासाठी कडक उपाययोजना राबविल्या जात आहेत.
याप्रकरणी सारंग ऊर्फ साऱ्या हनुमंत गायकवाड (वय १९ वर्षे, रा. सर्व्हे नं. ९४, सर्वोदय कॉलनी, मुंढवा, पुणे), ऋषीकेश ऊर्फ भोन्या गोवर्धन कांबळे (वय २३ वर्षे), अभिषेक उर्फ अभय उर्फ धनी धनराज गायकवाड (रा. म्हसोबा मंदीराजवळ, सर्वोदय कॉलनी, पुणे), हेमंत उर्फ लाल्या विलास गायकवाड (वय २१ वर्षे, रा. सर्वे नंबर ५, मुंगसे आळी, केशवनगर पुणे) यांना अटक करण्यात आली आहे.
पोलीस अंमलदार दिनेश भांदुर्गे यांना माहिती मिळाल्यानंतर, शिंदेवस्ती, केशवनगर, मुंढवा, पुणे येथे फिर्यादी यांचा सैमसंग कंपनीचा मोबाईल फोन जबरदस्तीने हिसकावून घेणारे सारंग गायकवाड, ऋषीकेश कांबळे या दोन आरोपींना दाखल गुन्ह्यात अटक करण्यात आली.
इतर आरोपीचा शोध घेत असता सर्व्हेलन्स विभागाचे पोलीस अंमलदार हेमंत झुरंगे यांना माहिती मिळाली की, गुन्ह्यातील आरोपी मुंढवा परिसरात थांबले आहेत. यावरून अभिषेक गायकवाड, हेमंत उर्फ लाल्या बिलास गायकवाड यांना अटक करण्यात आली. अटक आरोपींकडे दाखल गुन्हयाच्या अनुषंगाने अधिक चौकशी केली असता, त्यांनी गुन्ह्याची कबुली दिली. आरोपींकडून चोरीस गेलेला मुद्देमाल व गुन्हा करताना वापरलेले हत्यार जप्त करण्यात आले आहे.
