प्रतिनिधी अमित मुंडीक
Pune News : आगामी ४ जानेवारी रोजी होणाऱ्या एम.पी.एस.सी. संयुक्त गट-ब परीक्षेच्या पार्श्वभूमीवर पी.एस.आय. पदासाठी एक वर्षाची वयोमर्यादा वाढ देण्यात यावी, या मागणीसाठी एम.पी.एस.सी. विद्यार्थ्यांच्या शिष्टमंडळाने मुख्यमंत्री देवेंद्र फडणवीस यांची भेट घेतली. या भेटीदरम्यान विद्यार्थ्यांनी मुख्यमंत्र्यांना निवेदन सादर करून तात्काळ निर्णय घेण्याची मागणी केली.
मुख्यमंत्री देवेंद्र फडणवीस यांनी विद्यार्थ्यांशी सविस्तर चर्चा करत त्यांच्या अडचणी समजून घेतल्या. विद्यार्थ्यांच्या मागणीवर सकारात्मक विचार करून आजच यासंदर्भात निर्णय घेण्यात येईल, असे आश्वासन मुख्यमंत्र्यांनी दिले. त्यामुळे विद्यार्थ्यांमध्ये आशेचे वातावरण निर्माण झाले आहे.
या शिष्टमंडळात अनिकेत देशमाने, गणेश गोंडाळ, प्रविण पाटील, प्रदीप लोंढे, विवेक जाधव, माधुरी मोहिते आणि प्रियांका पवार यांचा समावेश होता. मुख्यमंत्री फडणवीस यांनी विद्यार्थ्यांच्या भवितव्याचा विचार करून योग्य निर्णय घेतला जाईल, असे स्पष्ट केल्याने एम.पी.एस.सी. उमेदवारांमध्ये समाधान व्यक्त करण्यात येत आहे.
