पुणे: पुणे जिल्ह्यातील मंचर परिसरात (Manchar News) घडलेल्या एका हृदयद्रावक घटनेने संपूर्ण भाग हादरला आहे. कौटुंबिक वादातून एका आईने स्वतःच्या लेकरांवरच जीवघेणा निर्णय घेतल्याची धक्कादायक घटना समोर आली आहे. (Pune News)
मिळालेल्या माहितीनुसार, आंबेगाव तालुक्यातील मंचर येथे शुक्रवारी (3 एप्रिल) सकाळी सुमारे 8:15 वाजण्याच्या सुमारास ही घटना घडली. हर्षदा बाणखेले या महिलेने आपल्या 14 वर्षीय मुलगी परिज्ञाचा गळा दाबून हत्या करण्याचा प्रयत्न केला. मुलगी बेशुद्ध पडल्याचे पाहून ती मृत झाल्याचा समज करून महिलेने पुढे टोकाचे पाऊल उचलले.
त्यानंतर हर्षदा बाणखेले यांनी आपल्या 6 वर्षीय मुलगा नेहाल याला सोबत घेत तपनेश्वर स्मशानभूमीजवळील विहिरीत उडी मारत आत्महत्येचा प्रयत्न केला. विहिरीत पडल्याचा आवाज ऐकून स्थानिक नागरिकांनी तत्काळ घटनास्थळी धाव घेतली. काही नागरिकांनी धाडस दाखवत विहिरीत उतरून महिला आणि मुलाला बाहेर काढले.
मात्र या दुर्घटनेत 6 वर्षीय नेहालचा जागीच मृत्यू झाला, तर महिला आणि 14 वर्षीय मुलगी गंभीर जखमी अवस्थेत आढळल्या. दोघींवर सध्या मंचर उपजिल्हा रुग्णालयात उपचार सुरू आहेत.
प्राथमिक तपासात, हर्षदा बाणखेले या गेल्या काही वर्षांपासून स्वतंत्र राहत असल्याचे समोर आले आहे. कौटुंबिक वादातून त्यांनी हे टोकाचे पाऊल उचलल्याची शक्यता पोलिसांनी व्यक्त केली आहे.
या घटनेने परिसरात तीव्र हळहळ व्यक्त केली जात असून, आईच्या हातूनच मुलाचा मृत्यू झाल्यामुळे नागरिकांमध्ये संताप आणि दु:खाचे वातावरण आहे. सध्या पोलीस या प्रकरणाचा अधिक तपास करत आहेत.
