Pune Crime : पुणे : पुणे जिल्ह्यातील शिक्रापूर परिसरात एटीएममध्ये पैसे काढण्यासाठी गेलेल्या एका ज्येष्ठ नागरिकाची फसवणूक झाल्याची धक्कादायक घटना समोर आली आहे. अनोळखी व्यक्तीकडून मदत घेणे या 50 वर्षीय व्यक्तीला भलतेच महागात पडले असून, भामट्याने त्यांच्या बँक खात्यातून तब्बल 60 हजार रुपये लंपास केले आहेत. या घटनेमुळे परिसरात खळबळ उडाली आहे.
नेमकं काय घडलं?
टाकळी भीमा येथील रहिवासी दत्तात्रय संपत वडघुले हे पुणे जिल्हा मध्यवर्ती सहकारी बँकेच्या एटीएम केंद्रावर पैसे काढण्यासाठी गेले होते. त्यांना पैसे काढताना काही अडचण येत असल्याचे पाहून त्यांच्या मागे उभ्या असलेल्या एका अज्ञात तरुणाने मदतीचा बहाणा केला. मी तुम्हाला पैसे काढून देतो असे म्हणत त्या तरुणाने वडघुले यांच्याकडून एटीएम कार्ड घेतले आणि त्यांना १० हजार रुपये काढून दिले. मात्र, हे पैसे काढून देताना त्या भामट्याने अत्यंत चालाखीने वडघुले यांचे मूळ एटीएम कार्ड स्वतःकडे ठेवून घेतले आणि त्यांना दुसरेच एक बनावट कार्ड हातात दिले. आपली फसवणूक झाली आहे हे वडघुले यांच्या लक्षात आले नाही आणि ते कार्ड घेऊन घरी परतले.
वडघुले घरी पोहोचल्यानंतर काही वेळातच त्यांच्या मोबाईलवर बँक खात्यातून 40 हजार रुपये काढले गेल्याचा संदेश आला. हा संदेश पाहून त्यांना धक्का बसला. त्यानंतर दुसऱ्या दिवशी पुन्हा त्यांच्या खात्यातून 20 हजार रुपये काढले गेल्याचा मेसेज आला. अशा प्रकारे दोन दिवसांत त्यांच्या खात्यातून एकूण 60 हजार रुपये चोरीला गेले. त्यांनी तातडीने बँकेत जाऊन चौकशी केली असता, त्यांच्या मूळ एटीएम कार्डाचा वापर करून कोणीतरी हे पैसे काढल्याचे स्पष्ट झाले.
याप्रकरणी आता शिक्रापूर पोलीस ठाण्यात अज्ञात तरुणाविरुद्ध गुन्हा दाखल करण्यात आला आहे. पोलीस सध्या एटीएम केंद्रातील सीसीटीव्ही फुटेजची तपासणी करत असून त्याआधारे आरोपीचा शोध घेतला जात आहे.
