लोणी काळभोर, ता. 14 : सामाजिक सलोखा आणि (Loni Kalbhor News) बंधुभावाचा संदेश देणारे सुंदर चित्र लोणी काळभोर येथे पाहायला मिळाले. पवित्र रमजान महिन्याच्या निमित्ताने ह. बागूलशहा वली दर्गा ट्रस्ट आणि शेर-ए-हिंद फ्रेंड सर्कल यांच्या वतीने आयोजित करण्यात आलेल्या दावत-ए-इफ्तार कार्यक्रमात हिंदू आणि मुस्लीम बांधव मोठ्या संख्येने सहभागी झाले. या कार्यक्रमातून लोणी काळभोरमध्ये पुन्हा एकदा हिंदू–मुस्लीम ऐक्याचे दर्शन घडले.
इफ्तारच्या या कार्यक्रमात विविध समाजघटकांतील मान्यवरांनी एकत्र येत बंधुभाव, एकोपा आणि सामाजिक सलोखा टिकवण्याचा संदेश दिला. रमजान महिन्यातील उपवास सोडण्याच्या या पवित्र क्षणी सर्वांनी एकत्र येऊन इफ्तार घेतला आणि परस्परांना शुभेच्छा दिल्या. त्यामुळे परिसरात एकात्मता आणि सौहार्दाचे वातावरण निर्माण झाले.
या कार्यक्रमाला प्रिंट व डिजिटल पत्रकार संघटनेचे जिल्हाध्यक्ष बापूसाहेब उर्फ राजेंद्र काळभोर, हवेली कृषी उत्पन्न बाजार समितीचे माजी उपसभापती सनी उर्फ युगंधर काळभोर, लोणी काळभोर पोलीस ठाण्याचे पोलीस उपनिरीक्षक योगेश पैठणे, पोलीस हवालदार रवी आहेर, संदीप जोगदंड, बापू वाघमोडे, आलमगीर जामा मशिदीचे अध्यक्ष फयाजभाई इनामदार, रशीद इनामदार, नईम इनामदार, समीर इनामदार, बाबूलाल इनामदार, अब्दुलभाई अक्कलकोटकर, अप्पासाहेब काळभोर, ॲड. सुजित कांबळे यांच्यासह हिंदू आणि मुस्लीम बांधव मोठ्या संख्येने उपस्थित होते.
दरम्यान, या दावत-ए-इफ्तार कार्यक्रमामुळे लोणी काळभोर परिसरात सामाजिक ऐक्य आणि सौहार्दाचे वातावरण निर्माण झाले असून “धर्म वेगळे असले तरी माणुसकी एकच” असा संदेश या उपक्रमातून देण्यात आला. विविध समाजघटकांतील नागरिकांनी एकत्र येऊन परस्परांतील प्रेम, विश्वास आणि बंधुभाव अधिक दृढ करण्याचे काम या कार्यक्रमातून झाले, अशी भावना उपस्थितांनी व्यक्त केली.
या कार्यक्रमाचे आयोजन ह. बागूलशहा वली दर्गा ट्रस्ट आणि शेर-ए-हिंद फ्रेंड सर्कल यांच्या वतीने करण्यात आले होते. या कार्यक्रमाच्या यशस्वी आयोजनासाठी रियाज शेख, शफी आतार, निजाम तांबोळी, शाहीर शेख, फिरोज तांबोळी, रिझवान तांबोळी, जुबेर तांबोळी, अलीम शेख, अखलाख शेख, फैज शेख, युनुस चौधरी, अरबाज मन्यार आदींनी विशेष परिश्रम घेतले.
