सोलापूर: संपत्तीसाठी माणुसकीला काळीमा फासल्याची धक्कादायक घटना सोलापूरच्या कृष्णा नगर भागात घडली आहे. केवळ एका जागेच्या वादातून पुतण्याने वृद्ध काका आणि काकूची उशीने तोंड दाबून निर्घृण हत्या केली. धक्कादायक म्हणजे, हा गुन्हा केल्यानंतर आरोपींनी चोरीचा बनाव रचून पोलिसांची दिशाभूल करण्याचा प्रयत्न केला.
सोलापूरच्या कृष्णा नगरमध्ये महादेव मंचाळ आणि रंगम्मा मंचाळ हे वृद्ध दाम्पत्य वास्तव्यास होते. महादेव मंचाळ हे अर्धांगवायूने आजारी असल्याने गेल्या अनेक दिवसांपासून अंथरुणाला खिळून होते. त्यांच्या हक्काच्या मालमत्तेवर पुतणे राहुल रामचंद्र मंचाळ आणि विकास रामचंद्र मंचाळ यांचा डोळा होता. तीन महिन्यांपूर्वी याच जागेवरून दोन्ही कुटुंबात कडाक्याचे भांडण झाले होते. काका-काकू जिवंत असेपर्यंत ही मालमत्ता आपल्याला मिळणार नाही, हे ओळखून दोन्ही पुतण्यांनी त्यांचा ‘काटा’ काढण्याचा कट रचला.
सोमवारी मध्यरात्रीच्या सुमारास संधी साधून राहुल आणि विकासने घरात प्रवेश केला. हालचाल करण्यास असमर्थ असलेल्या काकांचा आणि काकूंचा त्यांनी उशीने तोंड दाबून जीव घेतला. आपली मान वाचवण्यासाठी त्यांनी घरातील कपाटे उचकटली आणि सामान अस्ताव्यस्त फेकले, जेणेकरून हा दरोड्याचा प्रकार वाटेल.
घटनेची माहिती मिळताच एमआयडीसी पोलिसांनी घटनास्थळी धाव घेतली. घरच्या व्यक्तींच्या बोलण्यातील विसंगती आणि घटनास्थळावरील परिस्थिती पाहून पोलिसांना चोरीच्या कथेवर संशय आला. पोलिसांनी तांत्रिक तपास आणि पोलिसी खाक्या दाखवताच राहुल आणि विकासने अवघ्या 24 तासांत गुन्ह्याची कबुली दिली.
