Wagholi Crime : वाघोली, ता. 10 : कपड्यांच्या दुकानात काम करणाऱ्या सहकाऱ्याला कपडे व्यवस्थित ठेवण्यास सांगितल्याचा राग मनात धरून संतप्त झालेल्या तरुणाने आपल्या तीन साथीदारांसह कामगारावर हल्ला केल्याची घटना घडली आहे. या हल्ल्यात 22 वर्षीय कामगार गंभीर जखमी झाला असून त्याच्या डोक्याला चार टाके पडले आहेत.
मोहम्मद निजामुद्दीन मन्सुरी (वय 22, रा. ग्रीन हॉटेल मागे, केसनंद, ता. हवेली, जि. पुणे) असे जखमी तरुणाचे नाव आहे. त्यांच्यावर वाघोली येथील लाईफ लाईन हॉस्पिटलमध्ये उपचार सुरु आहेत. याप्रकरणी मन्सुरी यांनी दिलेल्या तक्रारीनुसार ओमकार मदन फुलारे (रा. बजरंग भेळ जवळ, आव्हाळवाडी) व अनोळखी तिघांवर वाघोली पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, मन्सुरी हे आव्हाळवाडी येथील एस.पी. कॉटन कपड्यांच्या दुकानात मजुरीचे काम करतात. शनिवारी (ता. 07) रात्री पाऊणे नऊ वाजण्याच्या सुमारास ते दुकानात काम करत असताना त्यांच्यासोबत काम करणाऱ्या ओमकार मदन फुलारे (रा. बजरंग भेळ जवळ, आव्हाळवाडी) याला कपडे व्यवस्थित ठेवण्यास सांगितले. यावरून दोघांमध्ये वाद झाला.
मन्सुरी यांनी मोठ्याने ओरडल्याचा राग मनात धरून ओमकार फुलारे हा दुकानातून बाहेर गेला आणि काही वेळातच आपल्या तीन साथीदारांसह परत आला. चौघांनी मिळून मन्सुरी यांच्याशी वाद घालत शिवीगाळ सुरू केली. मन्सुरी यांनी त्यांना समजावण्याचा प्रयत्न केला असता त्यांच्यावर लाथाबुक्क्यांनी मारहाण करण्यात आली. त्यानंतर एका इसमाने जड वस्तूने त्यांच्या कपाळावर जोरात वार केला. या हल्ल्यात त्यांच्या डोक्यातून मोठ्या प्रमाणात रक्तस्त्राव झाला.
घटनेनंतर आरोपी चौघेही तेथून पळून गेले. त्यानंतर मन्सुरी यांनी दुकानमालक सचिन परी यांना फोन करून घटनेची माहिती दिली. परी यांनी तत्काळ त्यांना आव्हाळवाडी येथील केअर हॉस्पिटलमध्ये दाखल केले. तेथे प्राथमिक उपचार करताना त्यांच्या डोक्याला चार टाके पडल्याचे डॉक्टरांनी सांगितले.
दरम्यान, तक्रार देण्यासाठी जात असताना मन्सुरी यांना पुन्हा चक्कर आल्याने त्यांना वाघोली येथील लाईफ लाईन हॉस्पिटलमध्ये दाखल करण्यात आले. त्यानुसार पुढील तपास वाघोली पोलीस करीत आहेत.
