पुणे: पुण्यातील लोहगाव परिसरात उघडकीस आलेल्या (Pune Crime) कौटुंबिक छळाच्या प्रकरणात न्यायालयाने महत्त्वाचा निर्णय देत सासू-सासऱ्यांचा जामीन अर्ज फेटाळला आहे. शेअर मार्केटमधील मोठ्या तोट्यामुळे सुनेवर माहेराहून पैसे आणण्यासाठी दबाव टाकल्याचा आरोप या प्रकरणात करण्यात आला आहे. (Latest Marathi News)
26 वर्षीय विवाहितेने दिलेल्या तक्रारीनुसार, तिचा पती आदित्य लोखंडे याला शेअर मार्केटमध्ये मोठा तोटा झाला होता. सुमारे 2 कोटी रुपयांचे कर्ज फेडण्यासाठी त्याने पत्नीवर सतत माहेराहून पैसे आणण्याचा दबाव टाकण्यास सुरुवात केली. या दबावासाठी केवळ शब्दिक छळच नव्हे, तर मारहाण आणि जीवे मारण्याच्या धमक्यांचाही वापर करण्यात आल्याचे फिर्यादीत नमूद आहे.
या प्रकरणात पतीसह सासरे अनिल लोखंडे, सासू सुवर्णा लोखंडे आणि नणंद समृद्धी लोखंडे यांच्याविरोधात गुन्हा दाखल करण्यात आला आहे. नणंदेला अटकपूर्व जामीन मिळाला असला तरी पती आणि सासू-सासरे सध्या न्यायालयीन कोठडीत आहेत.
जामिनासाठी केलेल्या अर्जावर सुनावणी करताना विशेष न्यायाधीश एस. एस. सस्ते यांनी आरोपांची गंभीरता लक्षात घेत सासू-सासऱ्यांचा जामीन अर्ज फेटाळला. आरोपींकडून झालेल्या छळाचे स्वरूप गंभीर असून तपासावर परिणाम होण्याची शक्यता लक्षात घेऊन हा निर्णय देण्यात आला.
या प्रकरणातील आणखी एक धक्कादायक बाब म्हणजे, लग्नावेळी सुनेच्या कुटुंबीयांनी मोठ्या प्रमाणावर खर्च केला होता. सुमारे 2 कोटी रुपये, 55 तोळे सोने, 2 किलो चांदी आणि आलिशान कार देऊनही तिच्यावर पुन्हा पैशांसाठी दबाव टाकण्यात आला. इतकेच नव्हे, तर पिस्तूल लावून धमकी दिल्याचाही आरोप आहे.
