पुणे : संपूर्ण देशभरात लोकसभा निवडणुकीची रणधुमाळी जोरात सुरू आहे. यावेळी संपूर्ण देशाचे लक्ष हे बारामती लोकसभा मतदारसंघाकडे आहे. या मतदारसंघामध्ये दररोज वेगवेगळ्या घडामोडी घडत आहे. लोकसभेला बारामतीत पवार विरुद्ध पवार अशी लढत होणार हे आता जवळपास निश्चित झाले आहे. त्यातच आमदार रोहित पवार आणि युगेंद्र पवार हे राष्ट्रवादी काँग्रेस शरदचंद्र पवार पक्षाच्या पदाधिकाऱ्यांसोबत प्रचार करत असताना विरोधकांकडून घेराव घालत आवाज दाबण्याचा प्रयत्न होत असल्याचा आरोप केला जात आहे. त्यामुळे त्या दोघांना तातडीने सुरक्षा मिळावी, अशी मागणी खासदार सुप्रिया सुळे यांनी पुणे ग्रामीण पोलीस अधीक्षकांकडे केली आहे.
खासदार सुप्रिया सुळे यांनी दिलेल्या पत्रात म्हटले आहे की, लोकसभा निवडणूक प्रचारासाठी आमदार रोहित पवार व युगेंद्र पवार हे ठिकठिकाणी जात आहेत. संविधानिक पध्दतीने, शांतपणे व लोकशाही मार्गाने लोकाशी सुसंवाद साधत आहेत.परंतु काही ठिकाणी त्यांना दडपशाहीचा सामना करावा लागत आहे. काही लोक घेराव घालून त्यांचा आवाज दाबण्याचा प्रयत्न करत आहेत. विविध वृत्तवाहिन्या व समाज माध्यमातून ही घटना सर्वांसमोर आली. संबंधितांची ही कृती पूर्णपणे असंविधानिक आहे.
ही घटना भारतरत्न डॉ. बाबासाहेब आबेडकरांनी राज्यघटनेद्वारे बहाल केलेल्या सर्वसामान्य नागरिकांच्या अभिव्यक्ती स्वातंत्र्याचा गळा घोटणारी आहे. यशवंतराव चव्हाण यांनी घडविलेल्या संवेदनशील महाराष्ट्रात असं घडणं शोभादायक नाही. या घटनांमुळे त्यांच्या सुरक्षिततेचे प्रश्न निर्माण झाला आहेत. त्यांच्या जीविताला धोका निर्माण झाला आहे.
ही अतिशय चिंतेची व गंभीर बाब आहे. सुसंस्कृत व विद्येचे माहेरघर असणाऱ्या पुणे जिल्ह्यात हे अपेक्षित नाही. यामुळे आमदार रोहित पवार व युगेंद्र पवार यांच्या सुरक्षिततेसाठी योग्य ती खबरदारी घेऊन त्यांना आवश्यक ती सुरक्षा तातडीने पुरविण्यात यावी, अशी विनंती खासदार सुप्रिया सुळे यांनी पुणे पोलीस अधीक्षक यांना केली आहे.
