लोणी काळभोर, (पुणे) : लोणी काळभोर (ता. हवेली) येथील एमआयटी शैक्षणिक संकुलात कार व रिक्षाचा अपघात झाल्याची घटना घडली आहे. ही घटना बुधवारी (ता.7) दुपारी तीन वाजण्याच्या सुमारास घडली. या अपघातात एक ज्येष्ठ महिला गंभीर जखमी झाली आहे. गीता सुरेश गायकवाड (वय -६५) असे जखमी झालेल्या महिलेचे नाव आहे. तर भाग्यश्री अलंकार सांगळे (वय -21, रा. वाघोली, ता. हवेली) असे भरधाव वेगाने कार चालविणाऱ्या मुलीचे नाव आहे.
याबाबत मिळालेल्या माहितीनुसार, गीता गायकवाड यांचे नातू लोणी काळभोर येथील एमआयटी शैक्षणिक संकुलात शिक्षण घेत आहेत. तर भाग्यश्री सांगळे या पण एमआयटी शैक्षणिक संकुलात शिक्षण घेत आहेत.
शाळा सुटल्यानंतर विद्यार्थ्यांना आणण्यासाठी गीता गायकवाड या रिक्षाने एमआयटी गेल्या होत्या. गायकवाड या मुलांना घेऊन पुन्हा रिक्षातून घराच्या दिशेने चालल्या होत्या. त्याचवेळी भाग्यश्री सांगळे या पण त्यांच्या कारणे चालल्या होत्या. तेव्हा भाग्यश्री सांगळे यांच्या कारचे नियंत्रण सुटले आणि त्यांनी समोरच्या रिक्षाला जोरदार धडक दिली. अशी प्राथमिक माहिती मिळत आहे.
या अपघातात गीता गायकवाड या गंभीर जखमी झाल्या असून त्यांच्यावर लोणी काळभोर येथील विश्वराज हॉस्पिटलमध्ये उपचार सुरू आहेत. सुदैवाने या घटनेत दोन लहान मुले बचावले आहेत. गीता गायकवाड यांची प्रकृती स्थिर असल्याची माहिती तेथील डॉक्टरांनी दिली आहे. या घटनेची माहिती मिळताच, लोणी काळभोर पोलीस घटनास्थळी दाखल झाले असून गुन्हा दाखल करण्याची प्रक्रिया सुरू आहे.
