पुणे : पुणे महापालिकेने शिवाजीनगर येथील आशानगर येथे बांधलेल्या पाण्याच्या टाकीच्या उद्घाटनाला उपमुख्यमंत्री अजित पवार येणार होते. मात्र, ते येण्यापूर्वीच काँग्रेस पदाधिकारी उद्घाटनस्थळी पोहोचले आणि कार्यक्रम उरकला. या पार्श्वभूमीवर दोन्ही बाजूचे कार्यकर्ते व पोलिसांमध्ये झटापट झाली. वार्तांकन करणाऱ्या पत्रकारांवर देखील पोलिसांनी दादागिरी केली. त्यामध्ये पत्रकारांच्या कॅमेऱ्याचे नुकसान झाले. पोलिसांनी चक्क काही पत्रकारांचे मोबाईल काढून घेतले. सर्व व्हिडिओ फॉरमॅट केले. तर एका कॅमेरामनला पोलिसांनी ताब्यात घेऊन थेट गाडीमध्ये डांबले. पत्रकारांवरील अन्यायाचा निषेध करत पुणे श्रमिक पत्रकार संघाने संबंधित अधिकाऱ्यांवर कारवाईची मागणी केली आहे.
पुणे महापालिकेने सुमारे साडेनऊ कोटी रुपये खर्च करून अशानगर येथे बारा लाख लिटर पाण्याची टाकी बांधलेली आहे. या पाण्याच्या टाकीचे उद्घाटन शुक्रवारी उपमुख्यमंत्री अजित पवार यांच्या हस्ते होणार होते. या कार्यक्रमाचे आयोजन शिवाजीनगर विधानसभा मतदारसंघाचे आमदार सिद्धार्थ शिरोळे यांनी केले होते. या टाकीची जागा ताब्यात घेणे भूमिपूजन करणे यासाठी काँग्रेसचे तत्कालीन नगरसेवक दत्ता बहिरट यांनी प्रयत्न केले होते. माझ्या प्रयत्नातून मोफत जागा मिळाली, निधी उपलब्ध करून दिला पण आज याची कदर न करता भाजप या कार्यक्रमाचे श्रेय लाटत आहे, असा आरोप केला होता. त्यावर काँग्रेसचे ज्येष्ठ नेते मोहन जोशी आणि आमदार रवींद्र धंगेकर यांनी भाजपने काँग्रेसला सन्मानाने कार्यक्रमाला बोलवावे अन्यथा आम्हीच या ठिकाणी उद्घाटन करू, असा इशारा दिला होता.
दरम्यान, पाण्याच्या टाकीचा उद्घाटनाचा समारंभ होण्यापूर्वी काँग्रेसचे मोहन जोशी, आमदार धंगेकर, बहिरट रमेश बागवे यांच्यासह अन्य पदाधिकारी आशा नगर येथे उपस्थित झाले. पोलिसांनी त्यांना रोखले पण धंगेकरांनी आतमध्ये जाऊन नारळ फोडून टाकीचे उद्घाटन केले. यावेळी काँग्रेस व पोलिसांमध्ये झटापट झाली. वार्तांकन करणाऱ्या पत्रकारांना पोलिसांनी आत जाण्यास मज्जाव केला. त्यांच्यासोबत झटापट केली. या झटापटीत एका वृत्तवाहिनीच्या कॅमेऱ्याचे नुकसान झाले. पत्रकार आणि पोलिसांमध्ये बाचाबाची झाली. कॅमेरा बंद पडल्याने मोबाईलमधून या घटनेचे वार्तांकन करत असताना पोलिसांनी वृत्तवाहिनीच्या वार्ताहराचा मोबाईल हिसकावून घेतला. एवढ्यावरच न थांबता चक्क मोबाईल फॉरमॅट मारून सर्व व्हिडिओ डिलीट केले.
या सर्व प्रकारानंतर पत्रकार संतापले. त्याच वेळी पोलिसांनी एका कॅमेरामनला उचलून पोलिसांच्या व्हॅनमध्ये डांबून ठेवले. तर पत्रकाराला उचलून बाजूला काढले यामुळे आक्रमक झालेल्या पत्रकारांनी पोलिसांना जाब विचारला. वरिष्ठ अधिकाऱ्यांना हा प्रकार समजल्यानंतर त्यांनी घटनास्थळी पोहोचून प्रकरण मिटवण्याचा प्रयत्न केला. अखेर बिचाऱ्या कॅमेरामनची सुटका करून मोबाईल परत करण्यात आला. पुणे श्रमिक पत्रकार संघाने या घटनेचा निषेध नोंदवला आहे.
