इंदापूर : बारामती लोकसभा मतदारसंघांमध्ये महायुती व महाविकास आघाडीकडून जोरदार ताकद लावली जात आहे. त्यातच उद्या इंदापूरमध्ये इंदापूर कृषी उत्पन्न बाजार समिती व पुणे जिल्हा बँकेचे संचालक आप्पासाहेब जगदाळे हे अजित पवार गट सोडून शरद पवार गटात शेकडो कार्यकर्त्यांसह प्रवेश करणार असल्याने इंदापूरमध्ये अजित पवार गटात उभी फूट पडणार आहे. शरद पवारांनी इंदापूरमध्ये अजित पवार गटाला मोठा धोबीपछाड दिला आहे.
आप्पासाहेब जगदाळे, आमदार यशवंत माने व आमदार दत्तात्रय भरणे यांनी गेल्या काही महिन्यांपूर्वी भारतीय जनता पार्टीला बाजूला ठेवून स्वबळावर इंदापूर कृषी उत्पन्न बाजार समितीवर अजित पवार गटाची सत्ता आणली होती. त्या अगोदर झालेल्या जिल्हा बँकेच्या निवडणुकीत अजित पवार गटाचे आप्पासाहेब जगदाळे बिनविरोध निवडून गेले होते. आता हेच आप्पासाहेब जगदाळे उद्या स्वतः शरद पवार यांच्या उपस्थितीत तुतारी हाती घेणार आहेत.
आप्पासाहेब जगदाळे यांच्या शरद पवार गटात जाण्याने सुनेत्रा पवार यांना मोठा धक्का बसणार असून अजित पवार गटाच्या अडचणीत वाढ होणार आहे. त्यामुळे सध्या सुरु असलेलया लोकसभा निवडणुकीत अजित पवार गटाच्या उमेदवार सुनेत्रा पवार यांना निवडून आणण्यासाठी अजित पवारांना मोठी कसरत करावी लागणार आहे. कारण त्यांच्याच गटातील एक-एक मोहरे शरद पवार गटात सामील होत आहेत.
