Viral News: बिहार : बिहारमधील मुजफ्फरपूर जिल्ह्यातून प्रेमाची एक आगळीवेगळी आणि धक्कादायक गोष्ट समोर आली आहे. प्रेमाला वयाचे बंधन नसते, हे या घटनेने पुन्हा एकदा सिद्ध केले आहे. मुजफ्फरपूरमधील औराई भागात राहणारे 60 वर्षीय राकेश कुमार शाह हे एक खासगी शाळा चालवतात. त्यांच्याच शाळेत 28 वर्षीय शाइस्ता परवीन ही तरुणी शिक्षिका म्हणून काम करत होती. एकत्र काम करत असताना या दोघांमध्ये प्रेमसंबंध निर्माण झाले आणि त्यांनी लग्नाचा निर्णय घेतला. वयातील 32 वर्षांचे अंतर असूनही या जोडप्याने समाजाचा विचार न करता नेपाळमध्ये जाऊन विवाह केला.
या लग्नानंतर शाइस्ताच्या घरच्यांनी मोठा गोंधळ घातला. शाइस्ताच्या भावाने औराई पोलीस ठाण्यात तक्रार दाखल केली की, त्याची बहीण शाळेत गेली होती पण तिथून ती बेपत्ता झाली आहे. त्याने शाळा संचालक राकेश कुमार यांच्यावर बहिणीचे अपहरण केल्याचा गंभीर आरोप केला. मात्र, हे प्रकरण तेव्हा अधिक रंजक झाले जेव्हा शाइस्ताने सोशल मीडियावर एक व्हिडिओ प्रसिद्ध केला. या व्हिडिओमध्ये तिने स्पष्टपणे सांगितले की, तिचे कोणीही अपहरण केलेले नाही. तिने आपल्या स्वतःच्या इच्छेने राकेश कुमार यांच्याशी प्रेमविवाह केला असून ती त्यांच्यासोबत आनंदी आहे.
या सर्व घडामोडींनंतर हे प्रकरण एका नाट्यमय वळणावर पोहोचले. 18 फेब्रुवारी रोजी भावाने अपहरणाची तक्रार दिली आणि त्याच्या दुसऱ्याच दिवशी म्हणजे 19 फेब्रुवारी रोजी शाइस्ताने एका मुलीला जन्म दिला. हॉस्पिटलमधील आई आणि बाळाचे फोटो सोशल मीडियावर वेगाने व्हायरल झाले.
पोलिसांनी माहिती मिळताच सीतामढी येथील एका खाजगी रुग्णालयातून शाइस्ताला ताब्यात घेतले. सध्या ती पोलिसांच्या देखरेखीखाली उपचार घेत आहे. वयाचे मोठे अंतर असूनही या जोडीने केलेल्या लग्नाची आणि त्यांच्या प्रेमाची चर्चा आता संपूर्ण बिहारमध्ये रंगली आहे. पोलीस सध्या या प्रकरणाचा कायदेशीर बाजूने तपास करत असून शाळा संचालक अद्याप पोलिसांच्या हाती लागलेले नाहीत.
