मुंबई: नाशिकमधील भोंदू अशोक खरात प्रकरणात शेकडो महिलांचे लैंगिक शोषण झाल्याचे आरोप समोर (Ashok Kharat) आल्यानंतर तपासाच्या कक्षेत आता राजकीय (Tejaswini Satpute) नावेही आल्याने प्रकरण अधिकच संवेदनशील बनले आहे. मोबाईल सीडीआरमधून काही नेत्यांची नावे समोर (Sushma Andhare) आल्यानंतर त्यांच्यावर कारवाई होणार का, त्यांना चौकशीसाठी कधी बोलावले जाणार, असा प्रश्न सातत्याने उपस्थित केला जात आहे. (Maharashtra Politics)
याच पार्श्वभूमीवर ठाकरे गटाच्या नेत्या सुषमा अंधारे यांनी थेट प्रश्न उपस्थित करत, अशोक खरातशी असलेल्या रुपाली चाकणकर आणि इतर नेत्यांना एसआयटी चौकशीसाठी कधी बोलावणार, अशी विचारणा केली. केवळ नावे समोर येऊनही पुढील कारवाई का होत नाही, असा मुद्दाही त्यांनी उपस्थित केला.
या प्रश्नांना उत्तर देताना एसआयटी प्रमुख तेजस्वी सातपुते यांनी स्पष्ट केले की, तपास हा केवळ नावांवर आधारित न करता साक्षीदारांनी दिलेल्या माहिती आणि ठोस पुराव्यांच्या आधारेच केला जात आहे. आतापर्यंत नोंदवलेल्या गुन्ह्यांच्या चौकटीतच कारवाई सुरू असून, कोणालाही केवळ चर्चेत आले म्हणून तातडीने चौकशीला बोलावले जाणार नाही. गेल्या 17 दिवसांपासून तपास सुरू असून पुढील काळातही तो सुरूच राहणार असल्याचे त्यांनी सांगितले. त्यामुळे राजकीय नेत्यांवर तात्काळ एफआयआर किंवा कारवाई होण्याबाबत स्पष्ट संकेत देण्याचे त्यांनी टाळले, मात्र पुरावे समोर आल्यास कारवाईची शक्यता नाकारली नाही. सातपुते यांनी सीडीआर लीक प्रकरणावरही भाष्य करत, हा डेटा बाहेर कसा आला याची शासन स्तरावर चौकशी सुरू असल्याचे सांगितले.
दरम्यान, या प्रकरणातील गंभीरता लक्षात घेता तपास वेगाने पुढे जात आहे. आतापर्यंत अशोक खरातविरोधात 11 गुन्हे दाखल झाले असून त्यापैकी 8 गुन्हे हे महिला अत्याचाराचे आहेत. 30 पेक्षा अधिक साक्षीदारांची चौकशी करण्यात आली आहे. आरोपीने स्वतःकडे दैवी शक्ती असल्याचा दावा करत महिलांची फसवणूक आणि लैंगिक शोषण केल्याचे समोर आले आहे.
सोशल मीडियावर व्हायरल झालेल्या संवेदनशील व्हिडिओंवरही मोठी कारवाई करण्यात आली असून, आतापर्यंत 4650 व्हिडिओ लिंक हटवण्यात आल्या आहेत. या सर्व पार्श्वभूमीवर, तपास पुढे जात असताना राजकीय कनेक्शनबाबत काय निष्पन्न होते, याकडे संपूर्ण राज्याचे लक्ष लागले आहे.
