मुंबई: राज्याचे माजी उपमुख्यमंत्री दिवंगत अजित पवार यांचे चिरंजीव जय पवार (Jay Pawar) यांनी लवकरच पत्रकार परिषद घेणार असल्याची (Ajit Pawar Death) घोषणा केली आहे. आपल्यावर कोणताही दबाव नसल्याचे स्पष्ट करत पुढील आठवड्यात सविस्तर भूमिका मांडणार असल्याचे त्यांनी सांगितले. विमान दुर्घटनेच्या पार्श्वभूमीवर त्यांच्या पत्रकार परिषदेकडे राजकीय वर्तुळाचे लक्ष लागले आहे. (Latest Marathi News)
जय पवार यांनी आज विमान दुर्घटनेत मृत्यू झालेल्या पिंकी माली हिच्या कुटुंबीयांची भेट घेतली. पिंकीच्या आईवर काही दिवसांपूर्वी शस्त्रक्रिया झाली होती आणि कालच त्यांना रुग्णालयातून घरी सोडण्यात आले. त्यानंतर जय पवार यांनी त्यांच्या घरी जाऊन त्यांची विचारपूस केली तसेच अपघाताच्या घटनेबाबतही चर्चा केली.
या भेटीनंतर माध्यमांशी बोलताना जय पवार यांनी पत्रकार परिषदेसंदर्भात स्पष्ट भूमिका मांडली. त्यांनी सांगितले की, आपल्यावर पत्रकार परिषद घेऊ नये असा कोणताही दबाव नाही. पुढील आठवड्यात पत्रकार परिषद घेऊन या प्रकरणाबाबत सविस्तर माहिती देणार असल्याचे त्यांनी स्पष्ट केले. या पत्रकार परिषदेत विमान दुर्घटनेशी संबंधित अनेक मुद्द्यांवर आपली भूमिका मांडली जाईल, असेही संकेत त्यांनी दिले.
दरम्यान, रोहित पवार यांनी केलेल्या वक्तव्याच्या पार्श्वभूमीवर जय पवार यांनी प्रतिक्रिया दिली. काहींनी आपल्यावर दबाव असल्याचे सूचित केले असले तरी तसे काहीही नसल्याचे त्यांनी स्पष्ट केले. तसेच आपण काही लोकांना VSR कंपनीच्या विमानातून प्रवास करू नये असा सल्लाही दिला असल्याचे त्यांनी सांगितले.
या प्रकरणात केंद्रीय अन्वेषण विभागाकडून म्हणजेच CBI मार्फत चौकशी व्हावी, ही मागणीही कायम असल्याचे जय पवार यांनी पुन्हा एकदा नमूद केले. त्यामुळे पुढील आठवड्यात होणाऱ्या त्यांच्या पत्रकार परिषदेत नेमके कोणते खुलासे होतात आणि या प्रकरणाला कोणते नवे वळण मिळते, याकडे सर्वांचे लक्ष लागले आहे.
