Yavat News यवत : यवत गावचे ग्रामदेवी असलेल्या श्री महालक्ष्मी मातेची आंबील गुगळीची सात काढून आषाढ यात्रेची सांगता करण्यात आली. (Yavat News) यवत व परिसरातील अनेक भाविकांचे श्रद्धास्थान असलेल्या श्री महालक्ष्मी मातेच्या गेल्या पंधरा दिवसापासून आषाढ मात्र निमित्त आखाड यात्रा साजरी होत असून, रविवार, मंगळवार, शुक्रवार या दिवशी आपला नवस पूर्ण करण्यासाठी अनेक भाविक या ठिकाणी येऊन आखाड यात्रा साजरी करतात. (Yavat News)
आषाढ यात्रेत अनेक भाविक येत असतात. पण यावर्षी पाऊस कमी असल्याने याचा परिणाम यात्रेवर देखील जाणवत होता. अपवाद वगळता अनेक दिवशी यात्रा कमी गर्दीत साजरी करण्यात आली. आषाढ यात्रा असल्याने अनेक भाविकांनी श्री महालक्ष्मी मातेचे दर्शन घेत नवस पूर्ण करण्यासाठी गोड गोड जेवणासह मांसाहारी जेवणाचा पंगती मंदिर परिसरात दिसून येत होत्या.
यावेळी नारळ, ओटी साहित्य, पेढे यांसह अनेक लहान मोठ्या खेळण्याचे व इतर दुकाने थाटली होती. महालक्ष्मी माता नवरात्र उत्सव ट्रस्टच्या वतीने श्री महालक्ष्मी मातेची विविध रूपांमध्ये आकर्षक अशी फुलांची सजावट करण्यात पूजा करण्यात आली होती.
अमावस्या आज असल्याने सायंकाळी चारच्या सुमारास श्री गणपती मंदिर येथे आरती करून सातेची सुरुवात करण्यात आली. हनुमान मंदिर, शितळादेवी, म्हसोबा चौक रायकर मळा, यवत गावच्या वेशीवरून पुणे सोलापूर रस्त्याने श्री महालक्ष्मी मंदिर येथे श्री महालक्ष्मी मातेस साडी चोळी करत आरती करण्यात आली. यानंतर श्री काळभैरवनाथ मंदिरात जाऊन श्री काळभैरवनाथ व जोगेश्वरी यांना पोशाख करून आरती करून आखाड यात्रेची सांगता करण्यात आली.
यावेळी दरवर्षीप्रमाणे देवीचे पारंपारिक पुजारी अशोक बाबा शेंडगे यांनी आंबील गुगळीचा सडा टाकत धार्मिक कार्य केले. यावेळी देवीचे पोतराज, गोंधळी यांसह ग्रामस्थ, भाविकभक्त व नागरिक मोठ्या संख्येने उपस्थित होते.
