विशाल शिंदे
भोर: भोर (Bhor News) तालुक्यातील मौजे कांजळे येथे जागेच्या वादातून एकाच कुटुंबातील सदस्यांमध्ये जोरदार वाद होऊन मारहाणीची घटना घडली आहे. या प्रकरणी दोन्ही बाजूंनी एकमेकांविरुद्ध फिर्यादी दाखल करण्यात आल्या असून, राजगड पोलीस ठाण्यात क्रॉस कंप्लेंट नोंदवण्यात आली आहे. या घटनेमुळे गावात खळबळ उडाली आहे.
समोर आलेल्या माहितीनुसार, 14 डिसेंबर 2025 रोजी दुपारी सुमारे 1 वाजण्याच्या सुमारास घडल्याचे फिर्यादी चंद्रकांत दिनकर गाडे (वय 60, रा. हरपळे वस्ती, फुरसुंगी ता. हवेली) यांनी तक्रारीत नमूद केले आहे. त्यांनी दिलेल्या माहितीनुसार, पुतण्या विकास पांडुरंग गाडे याच्या घरासमोर तीन खण जागा देण्याच्या मागणीवरून वाद झाला. यावेळी विकास गाडे याने जागा देण्यास नकार देत वाद घातला. या वादाचे रूपांतर हाणामारीत झाले असून, विकास गाडे याने चंद्रकांत गाडे व त्यांचा मुलगा संतोष यांना हाताने व लाथाबुक्यांनी मारहाण केल्याचा आरोप आहे. तसेच विकासची मुलगी कु. पल्लवी हिने विटेने चंद्रकांत गाडे यांच्या उजव्या बरगडीखाली मारल्याचे नमूद करण्यात आले आहे. याचवेळी विकासची पत्नी सौ. सुरेखा व भावजय अरुणा गाडे यांनी फिर्यादीची पत्नी रत्नमाला हिला मारहाण करून शिवीगाळ व जीवे मारण्याची धमकी दिल्याचा आरोप आहे. या प्रकरणी राजगड पोलीस ठाण्यात गुन्हा क्रमांक 442/2025 नोंदवण्यात आला आहे.
दरम्यान, याच घटनेबाबत दुसऱ्या बाजूनेही फिर्याद दाखल करण्यात आली आहे. विकास पांडुरंग गाडे (वय 48, रा. कांजळे ता. भोर) यांनी दिलेल्या तक्रारीनुसार, दिनांक 15 डिसेंबर 2025 रोजी दुपारी 1 वाजण्याच्या सुमारास त्यांच्या राहत्या घरासमोर चुलते चंद्रकांत गाडे, चुलत भाऊ संतोष गाडे, चुलती रत्नमाला गाडे व प्रणव प्रभाकर जाधव हे आले. तीन खण जागा परत घेण्याच्या कारणावरून वाद उफाळून आला. या वेळी चंद्रकांत गाडे यांनी लोखंडी गजाने विकास यांच्या पत्नी सौ. सुरेखा यांच्या डाव्या हातावर मारहाण केल्याचा आरोप आहे. तसेच संतोष गाडे यांनी लाकडी काठीने विकास यांना मारहाण केली, तर प्रणव जाधव यांनी अरुणा गाडे यांना हाताने मारहाण केल्याचे नमूद करण्यात आले आहे. याशिवाय रत्नमाला गाडे यांनी कु. पल्लवी हिला मारहाण केल्याचा आरोप असून, सर्वांनी शिवीगाळ व जीवे मारण्याची धमकी दिल्याचे तक्रारीत म्हटले आहे. या प्रकरणी गुन्हा क्रमांक 443/2025 दाखल करण्यात आला आहे.
दोन्ही बाजूंनी एकमेकांवर गंभीर आरोप केले असून, एकाच घरातील नातेवाईकांमध्ये जागेच्या वादातून हा वाद टोकाला गेला आहे. राजगड पोलीस ठाण्याचे प्रभारी अधिकारी पोलीस निरीक्षक गवळी यांच्या मार्गदर्शनाखाली या दोन्ही गुन्ह्यांचा पुढील तपास सुरू आहे. पोलिसांकडून दोन्ही तक्रारींची सखोल चौकशी करून सत्य परिस्थिती समोर आणण्याचा प्रयत्न केला जात असून, कायदेशीर कारवाई करण्यात येणार असल्याचे सांगण्यात आले आहे.
