दौंड (पुणे) : खरेदी केलेल्या शेतजमिनीच्या वादातुन पाटस (ता. दौंड) येथील एका ग्रामपंचायतीच्या सदस्याला दोघांनी लोखंडी गजाने बेदम मारहाण केल्याची घटना उघडकीस आली आहे. गुरुवारी (ता. २५) दुपारी हि घटना घडली आहे.
राजेंद्र विठ्ठल शिंदे असे मारहाण झालेल्या ग्रामपंचायत सदस्याचे नाव आहे. तर निखील नेताजी देशमुख व देवीदास सुदाम सोनवणे (रा. दोघेही पाटस ता. दौंड जि. पुणे) अशी मारहाण केलेल्या दोघांची नावे आहेत. याप्रकरणी शिंदे यांनी दिलेल्या तक्रारीनुसार दोघांवर यवत पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, पाटस ग्रामपंचायत हद्दीतील भानोबा नगर येथील जमीन दिड वर्षांपूर्वी पाच एकर क्षेत्र गोदाबाई हळंदे यांच्याकडून राजेंद्र शिंदे यांनी खरेदी केली होती. सदरचे क्षेत्र खरेदी केल्यापासून आरोपी देवीदास सोनवणे व निखील देशमुख यांच्यात वाद होता. गुरुवारी (दि २५) आरोपींनी शिंदे यांना तुमच्या सोबत बोलायचे आहे. तुम्ही आमचे घरी चला असे म्हणून घरी बोलावून घेतले. शिंदे त्यांच्या घरी गेले असता, तु आमचे परस्पर हळंदे यांचे क्षेत्र कसे काय विकत घेतले? ते आम्हाला खरेदी करायचे होते असे म्हणून शिवीगाळ करीत लोखंडी गजाने जबर मारहाण करण्यास सुरुवात केली.
दरम्यान, या मारहाणीत शिंदे यांच्या मांडीला, हाताला, पाठीला गंभीर मार लागल्याने जखमी झाले. तसेच शिंदे यांच्या बोटामधील सोन्याची अंगठी गहाळ झाली. याबाबत शिंदे यांनी यवत पोलीस ठाण्यात फिर्याद दिली असून वरील दोघांवर गुन्हा दाखल करण्यात आला आहे. या घटनेचा अधिक तपास पाटस पोलीस ठाण्यातील पोलीस हवालदार संजय देवकाते करीत आहेत.
