मुंबई: “मी रोज दोनदा ब्रश करतो, तरीही माझे दात का किडतात?” हा प्रश्न आजकाल अनेकांना भेडसावतोय. आपण दात घासतो, पण पद्धत चुकली कि दातांवरील ‘एनेमल’ (Enamel) संरक्षक कवच कमकुवत होते आणि किड लागण्यास सुरुवात होते. डेंटिस्ट्सच्या मते, केवळ ब्रश करणे पुरेसे नाही, तर ते कसे आणि केव्हा केले जाते हे महत्त्वाचे आहे.
ब्रश करूनही दात का किडतात?
१. चुकीची पद्धत: अनेकजण दात घासताना जोरजोरात घासतात. यामुळे दातांमधील घाण निघण्याऐवजी हिरड्यांना इजा होते आणि दातांचे संरक्षक कवच घासले जाते. दात नेहमी वर्तुळाकार किंवा वरून खाली या पद्धतीने घासावेत.
२. फ्लॉसिंगचा अभाव: ब्रश केवळ दातांच्या दर्शनी भागाची स्वच्छता करतो. दोन दातांच्या मधल्या फटीत अडकलेले अन्नकण ब्रशने निघत नाहीत. तिथेच बॅक्टेरिया वाढतात आणि कीड लागते. त्यामुळे दिवसातून एकदा ‘डेंटल फ्लॉस’ (दोऱ्याने स्वच्छता) करणे अनिवार्य आहे.
३. साखर आणि आम्लयुक्त पदार्थ: ब्रश केल्यानंतर जर तुम्ही गोड पदार्थ किंवा चहा-कॉफी घेत असाल, तर त्याचा थर दातांवर बसतो.
४. तोंड कोरडे पडणे: लाळेमध्ये नैसर्गिकरित्या दात स्वच्छ करण्याचे गुणधर्म असतात. जर तोंड वारंवार कोरडे पडत असेल, तर बॅक्टेरियांचा प्रादुर्भाव वाढतो आणि दात लवकर किडतात.
काय करावे?
-
दात किडण्यापासून वाचवण्यासाठी फ्लोराईड असलेली पेस्ट वापरा.
-
बॅक्टेरिया केवळ दातांवर नसून जिभेवरही असतात, त्यामुळे टंग क्लीनरचा वापर करा.
-
दर ३ महिन्यांनी आपला टूथब्रश बदला. जुन्या आणि कडक झालेल्या ब्रिस्टल्समुळे दातांचे नुकसान होते.
-
काहीही खाल्ल्यानंतर पाण्याने स्वच्छ गुळणा करण्याची सवय लावा.
जर तुमच्या दातांमध्ये काळे डाग दिसत असतील किंवा थंड-गरम लागण्याची समस्या असेल, तर घरगुती उपाय करण्याऐवजी तातडीने दंतवैद्याचा सल्ला घ्या. दर सहा महिन्यांनी एकदा दातांची तपासणी करणे आरोग्यासाठी फायदेशीर ठरते.
