Pune News पुणे : दारु पिताना चकना मागितला म्हणून अनोळखी व्यक्तीचा खून करणाऱ्या दोघांना बिबवेवाडी पोलिसांनी अटक केली आहे. (Pune News) तर खून झालेल्या व्यक्तीची अद्याप ओळख पटलेली नाही. (Pune News)
केतन शाम टेमकर (वय १९), ओंकार लक्ष्मण सणस (वय २२, दोघे रा. राजीव गांधीनगर, बिबवेवाडी) अशी अटक करण्यात आलेल्यांची नावे आहेत.
पोलिसांनी दिलेल्या माहितीनुसार, बिबवेवाडी भागातील सरगम चाळ परिसरातील मोकळ्या जागेत अनोळखी व्यक्तीचा मृतदेह सापडला होता. अनोळखी व्यक्तीच्या डोक्यात दगड घालून खून करण्यात आल्याचे निष्पन्न झाले होते. खून झालेल्या अनोळखी व्यक्तीची ओळख पटलेली नव्हती. मात्र बिबवेवाडी पोलिसांकडून या प्रकरणाचा तपास सुरु केला होता.
सदर गुन्ह्याचा अनुषंगाने सहायक पोलीस निरीक्षक प्रवीण काळुखे, उपनिरीक्षक संजय आदलिंग बिबवेवाडी भागात गस्त घालत होते. त्यावेळी आरोपी टेमकर व सणस यांनी एकाच्या डोक्यात दगड घालून खून केल्याची माहिती पोलिसांना एका खबऱ्यामार्फत मिळाली. मिळालेल्या माहितीच्या अनुषंगाने पोलिसांनी सापळा रचून दोघांना मोठ्या शिताफीने पकडले.
दरम्यान, पोलीसांनी दोन्ही आरोपींना ताब्यात घेऊन अधिक चौकशी केली असता, आरोपींनी सरगम चाळीच्या परिसरात एकाच्या डोक्यात दगड घालून खून केल्याची कबुली दिली. दारू पिताना एका अनोळखी व्यक्तीने चकना मागितला होता. चकना न दिल्याने वादावादी झाली. त्यानंतर चकना मागणाऱ्या व्यक्तीला मारहाण करुन त्याच्या डोक्यात दगड घातला, असे टेमकर, सणस यांनी पोलिसांना सांगितले.
ही कारवाई बिबवेवाडी पोलिस ठाण्याचे वरिष्ठ पोलीस निरीक्षक सविता ढमढेरे, गुन्हे शाखेचे निरीक्षक संजय पतंगे यांच्या मार्गदर्शनाखाली सहायक निरीक्षक प्रवीण काळुखे, संजय आदलिंग, शैलेश आलाटे, संतोष जाधव, सतीश मोरे, शिवाजी येवले, तानाजी सागर यांच्या पथकाने केली आहे.
